बुटवल । रुपन्देहीको तिलोत्तमा–४ ड्राइभरटोल निवासी पुष्पा टण्डनको मृत्यु घटना शंकास्पद देखिएको भन्दै तिलोत्तमा नगरपालिकाले विहिवार एक विज्ञप्ती जारी गर्दै निस्पक्ष छानविनको माग गरेको छ । नगरप्रमुख रामकृष्ण खाँणको हस्ताक्षरमा जारी विज्ञप्तीमा घटना शंकास्पद देखिएको हुँदा पीडित पक्षबाट बिरोध प्रदर्शन समेत भैरहेकाले निष्पक्ष छानविन गरी घटनाको वास्तविक सत्य तथ्य सार्वजनिक गर्न प्रहरी प्रशासन सँग माग गरिएको छ।
३६ वर्षीया टण्डनको साउन २७ गते रुपन्देहीको कञ्चन गाउँपालिकाको फायरलाइन जंगलमा रुपखमा झुडिएको अवस्थामा फेला परेकी थिइन् । सो घटना बारे निष्पक्ष छानविनको माग गर्दै तिलोत्तमा नगरपालिकाले जारी गरेको विज्ञप्तीमा लेखिएको छ– ‘रुखमा झुण्डिएको अवस्थामा भेटिएको र शवको प्रकृति हेर्दा समेत शंकास्पद देखिएको हुँदा सोको विषयलाई लिएर पीडित पक्षबाट विरोध प्रदर्शन समेत भइरहेको अवस्थामा घटनाको निष्पक्ष छानविन गरी घटनाको वास्तविक सत्य तथ्य सार्वजनिक गर्न प्रहरी प्रशासन समक्ष माग गर्दछौं ।
सो घटनालाई महिला हिंसा र सामाजिक न्यायको दृष्टिकोणबाट पनि हेर्दै पीडित पक्षको न्यायको लागि तिलोत्तमा नगरपालिका समन्वय र सहकार्य गर्न तयार रहेको पत्रमा उल्लेख गरिएको छ ।
