काठमाडौं । कोशी प्रदेशका मुख्यमन्त्री उद्धव थापाले आज (सोमबार) प्रदेशसभामा विश्वासको मत लिनुहुने भएको छ । साउन १६ गते थापा मुख्यमन्त्रीमा नियुक्त हुनुभएको थियो । नेपाली कांग्रेसका थापालाई गठबन्धन दलको साथ छ ।
संबैधानिक व्यवस्थाअनुसार उहाँले भदौ १४ गतेभित्र विश्वासको मत लिइसक्नुपर्ने व्यवस्था छ । विश्वासको मत लिन थापाले शुक्रबार कोशी प्रदेशसभा सचिवालयमा सूचना दर्ता गराउनुभएको थियो । गठबन्धनसँग ठिक्क बहुमत पुग्ने ४७ सांसद संख्या छ । तर सभा सञ्चालन गर्न उपसभामुख अनुपस्थित भए के गर्ने भन्नेमा गठबन्धनमा अन्योल देखिएको छ ।
सभामुख बाबुराम गौतमलाई राजिनामा गराएर गठबन्धनले साउन १६ गते मुख्यमन्त्री दाबी गरेको थियो । गठबन्धनका दलहरू नेपाली कांग्रेस, माओवादी केन्द्र, नेकपा एकीकृत समाजवादी र जनता समाजवादी पार्टीका ४७ प्रदेशसभा सदस्यको समर्थनमा थापा मुख्यमन्त्रीमा नियुक्त हुनुभएको हो । विपक्षमा एमालेका ४० र राष्ट्रिय प्रजातन्त्र पार्टीका ६ सांसद छन् ।
विश्वासको मत माग्दै कोशीका मुख्यमन्त्रीले विपक्षीलाई पत्र पठाउनुभएको छ । ६ सांसद रहेको राष्ट्रिय प्रजातन्त्र पार्टीको समर्थन पाउनेमा मुख्यमन्त्री थापा आशावादी देखिनु भएको छ ।
