काठमाडौं । नेपाली कांग्रेसका सभापति शेर बहादुर देउवाले स्वर्गीय प्रदीप गिरिको प्रेरणाबाट सिंगो पार्टी लाभान्वित भएको बताउनुभएको छ । सोमबार पार्टी कार्यालय सानेपामा समाजवादी चिन्तक, लेखक एवं कांग्रेसका निष्ठावान त्यागी नेता प्रदीप गिरीको पहिलो वार्षिकीमा आयोजित स्मरण सभामा बोल्दै देउवाले स्वर्गीय प्रदीप गिरिका कृतिहरुलाई पार्टीले प्रकाशित गरेर उहाँको प्रेरणाबाट सिंगो पार्टी लाभान्वित हुनुपर्नेमा जोड दिनुभयो ।
स्वर्गीय गिरिका लेख र कुरा हेर्दा गणतन्त्रका लागि धेरै अघिदेखि नै मत जाहेर गर्ने व्यक्तिका रुपमा आफुले बुझेको सभापति देउवाले बताउनुभयो । उहाँले स्वर्गीय प्रदीप गिरि कहिल्यै नथाक्ने समाजवादी चिन्तक भएको नेता रहेको औल्याउनुभयो ।
क्यान्सरबाट पीडित नेता गिरिको उपचारका क्रममा एक बर्ष अघि भाद्र ४ गते निधन भएको थियो । गिरिले एक दर्जनभन्दा बढी पुस्तक लेख्नुभएको छ ।
