काठमाडौं । नेपाली कांग्रेसले आफ्नो पार्टीका सह महामन्त्री महेन्द्र यादवमाथि भएको आक्रमणको घटनाका सम्बन्धमा गृहमन्त्रीको जवाफ माग गरेको छ । प्रतिनिधिसभाको बिहीबारको बैठकको बिशेष समयमा कांग्रेस मुख्य सचेतक रमेश लेखकले सदनको अर्को बैठकमा उक्त घटनाको बारेमा सम्पुर्ण विवरण सहितको जानकारी र अनुसन्धानका बिषयमा जानकारी गराउन माग गर्नुभएको हो ।
उहाँले आक्रमणको घटनाका तथ्य छानबिन गरी कडा कारवाही गर्नुपर्ने माग गर्नुभयो । लेखकले यादव माथिको आक्रमण व्यक्तिगत नभएर प्रवृति भएको भन्दै प्रवृत्तिको निर्मम ढंगले खोजी गर्नुपर्नेमा जोड दिनुभयो । उहाँले जनता गणतान्त्रिक व्यवस्थासँग सहमत नरहेको भन्दै कांग्रेस, एमाले र माओवादी जस्ता पुराना पार्टी खराब हुन् भन्ने कृत्रिम भाष्य निर्माण गर्न खोजिएको तर्क गर्नुभयो ।
अहिलेको व्यवस्था विरुद्ध आक्रमण गर्ने पूर्व तयारीको रूपमा निर्माण गर्न खोजिएको भाष्यका कारण संघीय लोकतान्त्रिक व्यवस्थाबाट विचलित हुने र भाग्ने कुनै कुरा नरहेको उहाँले बताउनुभयो । लेखकले कांग्रेस लोकतन्त्रको पक्षमा अविचलित पर्वत रहेको उल्लेख गर्दै खुकुरी प्रहार गरेर कांग्रेस मर्छ भन्ने भ्रम त्याग्न आग्रह गर्नुभयो ।
त्यस्तै मुख्य सचेतक लेखकले यादवमाथिको आक्रमण ज्यान मार्ने नियतले भएको स्पष्ट देखिएको कांग्रेसको बुझाई रहेको बताउनुभयो । महेन्द्र यादवमाथि बुधबार काठमाडौंको भुकुटीमण्डपमा खुकुरी प्रहार भएको थियो । खुकुरी प्रहारबाट घाइते यादवको उपचार जारी छ ।
