रुपन्देही । तिलोत्तमा नगरपालिकाका प्रमुख रामकृष्ण खाँणले सामुदायिक विद्यालयका १४९ जना विद्यार्थीलाई छात्रबृत्ति प्रदान गर्नु भएको छ ।

५९ औं राष्ट्रिय बाल दिवसकोे अवसरमा नगरपालिकामै आयोजित कार्यक्रममा उहाँले आफ्नो सेवा सुविधावाट वापत पाउने रकमबाट नगरभित्रका ४२ वटा सामुदायिक विद्यालयका १४९ जना जेहेन्दार तथा विपन्न वर्गका विद्यार्थीलाई ५ हजार रुपैयांका दरले छात्रवृत्ति वितरण गर्नु भएको हो। 

आर्थिक अभावमा शिक्षाबाट बञ्चित हुन नपरोस् भनेर आफ्नो सेवा सुबिधा नलिएर छात्रवृत्ति बितरण गरेको नगरप्रमुख खाणले बताउनुभयो।

नगरपालिकाले छात्रवृत्ति वितरणलाई व्यवस्थित बनाउन कार्यविधि बनाई छनौट तथा व्यवस्थापन समिति गठन गरेको छ । सम्बन्धित विद्यालय व्यवस्थापन समितिको निर्णय र वडा कार्यालयको सिफारिसको आधारमा जेहेन्दार तथा विपन्न वर्गका विद्यार्थीले छात्रवृत्ति प्राप्त गर्दै आएका छन् । 

उहाँका अनुसार यो वर्ष छात्रवृत्तिमा ७ लाख ४५ हजार खर्च भएको छ । प्रमुख प्रशासकीय अधिकृत नारायण अर्यालको स्वागतमा शुरु सो कार्यक्रममा कक्षा ८ , एस ई ई तथा १२ कक्षमा उच्च अंक ल्याउने बिद्यार्थी र बिद्यालयलाई समेत सम्मान गरिएको थियो। 

पारिश्रमिकको रकम छात्रवृत्तिमा लगाउनु भएकोमा नगरप्रमुख खाणको उपस्थित सबैले प्रशंसा गर्नुभएको थियो ।