बुटवल । तिलोत्तमामा एक महिलाको हत्या आरोपमा श्रीमान पक्राउ परेका छन् । तिलोत्तमा-१ शंकरनगर बस्दै आएकी ४३ वर्षीया यमकला पन्थीको हत्या आरोपमा ४५ वर्षीय मुमराज पन्थीलाई प्रहरीले पक्राउ गरेको छ ।
गुल्मीको धुर्कोट गाउँपालिका-४ स्थायी घर भई हाल रुपन्देहीको तिलोत्तमामा बस्दै आएकी यमकला भदौं २७ गते विहान घर अगाडि मृत अवस्थामा फेला परेको ईलाका प्रहरी कार्यालय बुटवलका प्रहरी नायव उपरीक्षक दानबहादुर थापाले बताउनु भएको हो ।
तिलोत्तमाको एक घरको माथिल्लो तलामा डेरा गरि बस्ने यमकला जमिनमै मृत अवस्थामा देखेपछि स्थानीयले प्रहरीलाई खबर गरेका थिए । घटनापछि आमाको हत्या भएको भन्दै छोराले बुवा विरुद्ध जाहेरी दर्ता गराएको थापाले बताउनु भयो ।
दैनिक ज्यालादारी गरेर बस्ने उक्त दम्पत्ति दुबै जना मापसे गर्ने र समय समयमा झैझगडा गरिरहने नजिकका आफन्तहरुले बताएका छन् ।’प्रहरी नायव उपरीक्षक थापाले भन्नुभयो ‘शवको प्रकृति हेर्दा हत्याको त्यस्तो प्रहरीको प्रारम्भिक रिपोर्टमा सवुत वा आधारहरु भेटिएका छैनन्, यद्यपि उनका छोराले हत्या भएको भन्दै जाहेरी दर्ता गराएका छन्। हामी अनुसन्धानमै छौ ।’
बहिनी तथा माइती पक्षले हत्या आरोप लगाएका छन् भने छोराले विहिबार प्रहरीमा जाहेरी दर्ता गराएका छन् ।शवलाई बुटवलको लुम्बिनी प्रादेशिक अस्पतालमा राखिएको छ । आइतबार थप अनुसन्धानका लागि फरेन्सिक जाँच टोलीबाट रिपोर्ट तयार पारिने प्रहरीले जनाएको छ ।
