काठमाडौं । नेपाली कांग्रेसका उपसभापति पूर्णबहादुर खड्काले राजनीतिमा प्रवेश गरेपछि ताली र गाली दुवै स्वीकार्नुपर्ने बताउनुभएको छ । उहाँले पार्टीका कार्यकर्ताहरूले पूरा कुरा नसुनी प्रश्न गरेको भन्दै धैर्यताका साथ सुनेर प्रश्न गर्न आग्रहसमेत गर्नुभयो ।
सोमबार नेपाली कांग्रेसको केन्द्रीय समितिको बैठकमा उपसभापति खड्काले आफू राजनीतिमा लाग्दा ताली र गालीलाई ग्रहण गर्छु भनेर स्वीकारेको बताउनुभयो ।
उहाँले भन्नुभयोे, ‘राजनीतिक जीवनमा प्रवेश गर्दा ताली र गाली दुवै कुरालार्ई स्वीकार गरेको छु । सबै कुरालाई स्वीकार्नुपर्छ र जवाफ दिनुपर्छ । स्पष्ट पार्नुपर्छ ।’
कार्यवाहक प्रधानमन्त्री समेत रहनुभएका उपसभापति खड्काले पार्टीका कार्यकर्ताहरूले पूरा कुरा सुन्नुपर्नेमा जोड दिँदै आधा कुरा सुनेर आक्रोशित नहुन आग्रह समेत गर्नुभयो । शिक्षकहरूको आन्दोलनलार्ई जुन हदसम्म सहमति गर्न सकिन्थ्यो त्यो गरेको उहाँको भनाइ छ ।
उपसभापति खड्काले अब संसद्को प्रकृयामा जाँदा सरकारकातर्फबाट दलको प्रमख सचेतकसँग छलफल गर्ने र संसद्मा समावेश गर्ने बताउनुभएको हो ।
