रेशम कुवँर,गुल्मी । गुल्मीको रेसुंगा-३ मा गएको पहिरोमा पुरिएर एक जना मजदुरको मृत्यु भएको छ भने २ जना घाइते भएका छन् ।
रेसुङ्गा नगरपालिका–३ भाडगाँउ स्थित शेरबहादुर बेल्वासेको निर्माणधीन घर माथिबाट पहिरो खस्दा एक मजदुरको मृत्यु भएको जानकारी जिल्ला प्रहरी कार्यालय गुल्मीले दिएको छ।
जिल्ला प्रहरी कार्यालय गुल्मीका प्रहरी उपरीक्षक एसपी नवीन किशोर प्रधानले दिएको जानकारी अनुसार मृत्यु हुनेमा प्युठान जिल्ला गौमुखी गाउँपालिका वडानम्वर ३ निवासी १७ वर्षका डोरबहादुर घर्ती रहेका छन् ।
पहिरोमा परेर रेसुङ्गा नगरपालिका वडानम्वर–३ निवासी घरधनी ७९ वर्षका शेरबहादुर बेल्बासे र प्युठान जिल्ला गौमुखी गाउँपालिका वडा नम्वर ३ निवासी २४ वर्षका टेकबहादुर घर्ती घाइते भएको जानकारी प्रहरी प्रमुख प्रधानले दिनुभयो। घाइतेको गुल्मी जिल्ला अस्पतालमा सामान्य उपचार पछि घर फर्केको प्रहरीले जनाएको छ ।
