चितवन । पोल्ट्रीको राजधानीको रुपमा रहेको चितवनमा पोल्ट्री व्यवसाय धरासायी बन्दै गएको गुनासो व्यवसायीहरुले गरेका छन् ।
विश्व अण्डा दिवसका बिषयमा जानकारी दिन मंगलबार चितवनमा आयोजित पत्रकार सम्मेलनमा उनीहरुले कोरोना महामारीका साथै दानाको मुल्य बृद्धि र बैकको चर्को ब्याजका कारण पोल्ट्री ब्यबशाय ओरालो लाग्ने क्रममा रहेको बताएका हुन् ।
अण्डा लगाएत पोल्ट्रीजन्य उत्पादनले उत्पादन लागत पनि नपाउने गरेको नेपाल लेयर्स कुखुरा पालक सघका अध्यक्ष बिनोद पोखरेलले बताउनुभयो ।
चितवनमा रहेका कुखुरा पालक किसान ह्याचरी उद्योगहरु आधा भन्दा बढी बन्द भईसकेको उहाँले बताउनुभयो । पोल्ट्री क्षेत्रले देशको कुल ग्राहस्थ उत्पादनको करीब ४ प्रतिशत योगदान दिनुका साथै ५ लाख ब्यक्तिलाई रोजगार प्रदान गरेको संघले जनाएको छ ।
कोभिड भन्दा अगाडी दैनिक ५० देखि ५५ लाख अण्डा उत्पादन हुने गरेकोमा अहिले घटेर ३० लाख गोटामा झरेको छ । चितवन र यसको आसपासको क्षेत्रमा हाल करीब १६ लाख लियर्स कुखुरा रहेको र १ सय ५० किसान आबद्ध रहेका छन् ।
पोल्ट्री ब्यवसाय प्रति सरकारको नितिगत कारणले गर्दा पोल्ट्री ब्यवसायीहरु समश्यामा परेको नेपाल ह्याचरी महासघका अध्यक्ष गुणचन्द बिष्टले बताउनुभयो । पोल्ट्री ब्यवसायको अबस्था नाजुक रहेकै अबस्थामा असोज २६ गते बिश्व अण्डा दिवस मनाउन लागिएको उनीहरुले जनाएका छन् ।
