अर्घाखाँची। हिन्दुहरूको दोस्रो महान चाड शुभ दीपावली (तिहार) २०८० कार्तिक २५ गते शनिबार धवन्तरि जयन्ती तथा यमपन्चको पहिलो दिन काग तिहारको अवसर पारेर काग सम्मेलन गरिने भएको छ ।
विभिन्न पशुपंक्षिको हुबहु आवाज निकाल्ने प्रतिभा भएका युवा प्रतिभा पुरस्कार तथा विभिन्न आइडल टयालेन्ट हन्ट शो बाट समेत सम्मानित भएका भुवनेश्वर अधिकारी २०७३ साल देखि विभिन्न मिडियामा आबद्ध हुनुहुन्छ । उहाँको पहिलो काग सम्मेलन २०७४ साल देखि लगातार २०८० को सातौ काग सम्मेलन हुने बताइएको छ ।
अहिलेसम्म ७ वर्ष निरन्तर काग सम्मेलनको समन्वयमा सातौ बृहत् काग सम्मेलन २०८० हुने भएको छ । अर्घाखाँचीको सन्धिखर्कमा रहेको सामुदायिक रेडियो देउराली १०१ मेगाहर्जबाट काग सम्मेलन हुदैँ आएकोमा अहिलेपनि सोहि रेडियोको अन एयरबाटै काग सम्मेलन हुने भएको छ ।
उहाँले विश्वमै पहिलोपटक रेडियोको अनएयरबाट प्रत्यक्ष काग सम्मेलन गर्नुहुने भएको छ । रेडियोको अनएयरबाट प्रत्यक्ष प्रसारण मार्फत कागको आवाज निकाल्दा रेडियो स्पिकरबाट आवाज सुनेर कागहरु वरिपरि उड्ने र रेडियोको नजिक कागहरु एकत्रित हुने हास्य कलाकार अधिकारीले बताउनुभयो ।
काग सम्मेलनको उदेश्य नेपालमा बढदै गएको बेरोजगार,विदेश पलायन हुनु,सरकारको गैरजिम्मेवार नेतृत्व भ्रष्टाचार विरुद्ध र भुकम्पजस्ता प्राकृति विपत्ति नहोस् भन्ने हेतुले काग सम्मेलन गर्ने बताउनुभएको छ, मुख्यत नेपाली क्रीकेट टिमको अहिलेको उचाइ झै सुखि र समृद्धि नेपालको परिकल्पना समेत गरेको बताउनुभयो। यस्तै कार्यक्रम रेडियो देउरालीको समन्वयमा देशभरका सयौं बढि रेडियोबाट प्रशारण हुने बताइएको छ ।
