काठमाडौं। नेपाली कांग्रेसका महामन्त्री तथा पूर्वमन्त्री गगन थापाले नेताहरुले गम्भीर गल्ती गरेको टिप्पणी गर्नुभएको छ । अब नेताहरुले आफूले गरेका गल्तीमा जनतासँग हजारपल्ट माफी माग्नुपर्ने बताउनुभएको छ ।
उहाँले अहिलेको व्यवस्थाको बचाउ गर्दै कसैलेपनि व्यवस्थामाथि टिप्पणी गर्न नहुने सुझाव दिनुभयो । आज (बुधबार) नवलपुरमा भएको पार्टीको एक कार्यक्रमलाई सम्बोधन गर्दै उहाँले यस्तो बताउनुभएको हो ।
उहाँले भन्नुभयो,‘हामीले गल्ती गरेका छौँ हजारपटक जनतासँग माफी माग्नुपर्छ, ०५१ मा मध्यावधिमा नगएको भए माओवादी आउँदैनथ्यो । माओवादीको कारणले देशको १५ वर्ष खेर गएको छ । अनावश्यक युद्ध भयो ।
यही व्यवस्थामा आउनु थियो भने युद्ध किन ? हामीले ०५६ मा बहुमत पायौँ थेग्न सकेनौँ । छलफल गर्नुपर्छ । कसैलाई दोष दिएर हुँदैन । हामीले गरेको गल्तीको भारी बोक्न तयार हुनुपर्छ । हामीले गरेको गल्तीको भारी व्यवस्थालाई बोकाउन खोज्यौँ ।”
उहाँले अहिले नागरिकमा तिव्र असन्तुष्टि र अलमल रहेको स्विकार्नुभएको छ । थापाले भन्नुभयो,‘वरिपरिका केही कुरा देखेका छौँ । नागरिकमा तीव्र असन्तुष्टि या अलमल छ । कोही किसानलाई भेटेँ भने रिसाएको देखिन्छ, रिसाउनुपर्ने कारण पनि छ, जुन सहरमा पनि सटर छाडेर भागेको अवस्था छ ।
सहकारीको ऋण तिर्न सकेको छैन । नेपाल पहिला कसले छाड्ने भन्नेमा तछाडमछाड गरिरहेकोजस्तो लाग्छ । छटपटाहट देखिन्छ । अब लुकाएर हुँदैन । यसको बारेमा चर्चा र चिन्तन गर्नैपर्ने हुन्छ ।”
