गुल्मी। गुल्मीको रेसुङ्गा नगरपालिका -४ अर्खलेमा बस र मोटरसाइकल एक आपसमा ठोक्किदा मोटरसाइकल चालकको मृत्यु भएको छ।
जिल्लाको रेसुङ्गा नगरपालिका–४ अर्खलेमा सिमलटारीदेखि तम्घासतर्फ आउदै गरेको लु १ ख ९४७५ नम्बरको बस र जिल्लाको सदरमुकाम तम्घासबाट सेउघा जाँदै गरेको लु ८७ प ९८१ नम्बरको मोटरसाइकल आपसमा ठोक्किदा रेसुङ्गा नगरपालिका -४ सेउघा निवासी अन्दाजी १९ बर्षका विवेक झाक्री मगरको मृत्यु भएको जानकारी जिल्ला प्रहरी कार्यालय गुल्मीले दिएको छ।
सदरमुकाम स्थित महेन्द्र माध्यमिक विधालयमा कक्षा १२ मा अध्ययनरत झाक्री बिहानको पढाइ सकेर घर फर्कने क्रममा दुर्घटनामा परेका थिए ।
दुर्घटनामा परि घाइते मोटरसाइकल चालक झाँक्री मगरको उपचारको क्रममा मृत्यु भएको जिल्ला प्रहरी कार्यालय गुल्मीका प्रमुख प्रहरी उपरीक्षक नविन किशोर प्रधानले जानकारी दिनुभयो ।
बसको ठक्करबाट घाइते झाँक्री मगरको गुल्मी अस्पतालमा उपचारको क्रममा बिहान ११ बजे मृत्यु भएको जिल्ला प्रहरी प्रमुख प्रधानले जानकारी दिनुभएको छ ।
मृतक झाँक्री मगरको शवलाई पोष्टमार्टम गरि परिवारलाई जिम्मा लगाउने तयारी भैरहेको छ भने मोटरसाइकललाई ठक्कर दिने बसका चालकलाई प्रहरीले नियन्त्रणमा लिई थप अनुसन्धान गरिरहेको प्रहरीले जनाएको छ ।
