काठमाडौँ । पुस १४ र १५ गते भारतको उत्तर प्रदेश स्थित आगरामा हुने अन्तराष्ट्रिय कराँते च्याम्पियनसीप-२०२३ मा भाग लिन नेपालको प्रतिनिधित्व गर्दै विराटनगरबाट ११ जना खेलाडीलाई बिदाइ गरिएको छ ।
विराटनगर– ११ स्थित बालाजी डोजोका ११ जना खेलाडीसहित प्रशिक्षक र व्यवस्थापकलाई एक कार्यक्रम आयोजना गरी मोरङ कराँते महासंघले सफलताको शुभकामनासहित बिदाइ गरेको हो । उनीहरू भोलि त्यसतर्फ जानेछन् ।
खेलाडीहरूलाई नेपाल खेलकुद महासंघका केन्द्रीय अध्यक्ष एवं कोशी प्रदेश खेलकुद बिकास बोर्डका संस्थापक सदस्यसचिव पर्शुराम बस्नेतले टीका र खादा लगाएर बिदाइ गरेका थिए ।
कराँते महासंघ मोरङ अध्यक्ष रुपेश बरालको अध्यक्षतामा सम्पन्न कार्यक्रममा प्रमुख अतिथि बस्नेतसहित जनपथ माविका व्यवस्थापन समिति अध्यक्ष रोहित कोइराला, विराटनगर-११ का वडाअध्यक्ष तिर्थेन्द्र न्यौपाने, जनपथ माविका प्रधानाध्यापक हरिप्रसाद पराजुली, नेपाल खेलकुद महासंघका सूरज श्रेष्ठ, कराँते प्रशिक्षक मेनुका ठाकुरलगायत अभिभावकहरूको उपस्थिति थियो ।
उक्त प्रतियोगितामा भाग लिन विराटनगरबाट आकृति कोइराला, सोनीया वन, आरुषा कोइराला, अन्वेशा न्यौपाने, दुर्गेशकुमार यादव, सन्तोषकुमार साह, अमन सहनी, बिबेक सिंह, पंकज साह, आलोक ठाकुरर बिशाल चौधरीले सहभागिता जनाउनेछन् ।
खेलाडीहरूको साथमा प्रशिक्षकद्वय भुवन कट्टेल र मेनुका ठाकुर तथा व्यवस्थापक अजय ठाकुर छन् । च्याम्पियनसीपमा खेलाडीहरूले विभिन्न स्पर्धामा भाग लिने प्रशिक्षक ठाकुरले जानकारी दिइन् ।
