सरु भुसाल,गुल्मी । रुरुक्षेत्र गाउँपालिकाले चालू आर्थिक वर्षमा ५३ करोड ५४ लाख ९७ हजार २३० रुपियाँ विनियोजित भएको बजेट संशोधन गरेको छ । गाउँपालिकाले गाउँसभाको १५ औं अधिवेशनबाट विनियोजित बजेटलाई संशोधन गरेर ५७ करोड ६२ लाख १७ हजार रुपियाँ कायम गरेको गाउपालिका अध्यक्ष यदु ज्ञवालीले जानकारी दिनुभयो ।
गाउँसभामा चालू आर्थिक वर्ष २०८०/०८१ को नीति तथा कार्यक्रम र बजेट संशोधनका लागि सभामा गाउँपालिका उपाध्यक्ष मिनादेवी गौतमले पेश गर्नु भएसंगै संशोधित कार्यक्रम तथा बजेटमा छलफल भएको थियो ।
गाउँसभाको १५ औं अधिवेशनबाट चालू आर्थिक वर्ष २०८०/०८१ को कार्यक्रम र बजेट संशोधन भएको छ । गाउँपालिकाले आ.व. ०८०/०८१ को बजेट निर्माण गर्दा अनुमान गरेको अ.ल्या. रकममा वृद्धि भएको हुँदा बजेटको आकारमा वृद्धि गरिएको प्रमुख प्रशासकीय अधिकृत लक्ष्मण पाण्डेले बताउनुभयो ।
गाउँसभाको १५ औं अधिवेशनबाट ४ करोड ३१ लाख ४९ हजार ३०० रुपियाँ संशोधन गरिएको छ । जसमा चालूतर्फ १ करोड १ लाख रुपियाँ र पूँजीगततर्फ ३ करोड ३० लाख ४९ हजा ३०० रुपियाँ बजेट संशोधन गरिएको उहाँले दाबि गर्नुभयो।
गाउँसभामा गाउँपालिकाले स्वास्थ्य तथा सरसफाइ ऐन, २०७५ को पहिलो संशोधन गरेको छ त्यसैगरी सभाले खानेपानी तथा सरसफाइ र स्वच्छता सम्बन्धमा व्यवस्था गर्न बनेको विधेयक, २०८० लाई स्वीकृत गरेको गरेको प्रमुख प्रशासकीय अधिकृत पाण्डेले जानकारी दिनुभयो ।
त्यस्तै, गाउँसभामा गाउँपालिकाको आ.व. ०७४/०७५ देखि हाल सम्म कायम भएको ८ करोड ४७ लाखको बेरुजु सम्परीक्षणको लागि सभामा छलफल गरिएको थियो । गाउँसभाबाट कार्यपालिकाका यस आ.व. का हालसम्मका बैठकका निर्णयहरु अनुमोदन गरिएको पान्डेको भनाइ छ ।
गाउँसभाका गाउँपालिका अध्यक्ष यदु ज्ञवालीले गाउँपालिकाबाट यस आर्थिक वर्षमा हाल सम्म सम्पादन भएका मुख्य उपलब्धीहरुको बारेमा सभालाई जानकारी गराउनुभउको थियो ।
गाउँपालिकामा विभिन्न समयमा नागरिकहरुले आफ्नो आवश्यकता अनुसार माग गर्नु भएका योजनाहरुलाई संबोधन गरि सबै वडाहरुलाई समानुपातिक किसिमले कार्यक्रम तथा बजेट विनियोजन गरिएको गाउँपालिका अध्यक्ष यदु ज्ञवालीले बताउनुभयो।
१५ औ गाउँसभाबाट विभिन्न ८६ वटा कार्यक्रमको लागि ४ करोड ४१ लाख ४९ हजार ३०० रकम विनियोजन गरिएको थियो भने विभिन्न १० वटा कार्यक्रमहरु संशोधन भएका थिए। गाउँसभामा सार्वजनिक सरोकारका विभिन्न विषयहरुमा निर्णय भएको प्रमुख प्रशासकीय अधिकृत पाण्डेले बताउनुभयो ।
