बुटवल । राष्ट्रिय खेल भलिबलको क्रेज रहेको रुपन्देहीमा लामो समय पछाडी प्रतियोगिता हुने भएको छ ।
प्रतियोगिता प्रदेश खेलकुद परिषद लुम्बिनीको मुख्य प्रवद्र्धन, नेपाल भलिबल संघको समन्वय र मणिमुकुन्द भलिबल क्लबको आयोजनामा माघ २६ देखि फागुन २ गतेसम्म नवौ संस्करणको मणिमुकुन्द कप राष्ट्रिय पुरुष भलिबल प्रतियोगिता २०८० हुने भएको हो ।
प्रतियोगिताको विभिन्न उपसमिति गठन गरी परिचालन भएको बुधबार पत्रकार सम्मेलन गरि क्लबका अध्यक्ष लोकेन्द्र बहादुर भण्डारीले जानकारी दिनुभयो । वि.सं २०६४ सालपछि यस क्षेत्रका खेलप्रेमीहरुलाई भलिबलका चाख मेटाउने बताउनुभयो ।
प्रतियोगितामा त्रिभुवन आर्मी क्लब, नेपाल पुलिस क्लब, एपिएफ गरी ३ विभागीय टिमसहित कोशी, मधेश प्रदेश, बागमती, गण्डकी, लुम्बिनी, कर्णाली र सुदुर पश्चिम प्रदेश गरी सातै प्रदेशका गरी १० टिमले उपाधिका लागि प्रतिस्पर्धा गर्ने उहाँले बताउनुभयो ।
प्रतियोगिताको उपाधि विजेता टिमले नगद २ लाख रुपैयाँ, कप, मेडल प्रमाणपत्र, उपविजेता टिमले नगद १ लाख ५० हजार, रुपैया, कप, मेडल प्रमाणपत्रबाट पुरस्कृत गरिने उनले बताए ।
यसैगरी तृतीय टिमले नगद १ लाख तथा सान्त्वना टिमले नगद ५० हजार रुपैयाँ, प्रमाणपत्रबाट पुरस्कृत गरिने बताइएको छ । प्रतियोगितामा विधागत रुपमा उत्कृष्ट खेलाडी, उत्कृष्ट सर्भर, स्पाईकर, डिफेन्स, ब्लकर, सेटर, प्रशिक्षक तथा अनुशासित खेलाडीहरुलाई समेत पुरस्कृत गरिने छ ।
एकैपटक २ हजार ५ सय जना दर्शकले सहज ढंगबाट हेर्न मिल्ने गरी प्याराफिट तयार गरिएको बताउदै तिलोत्तमा नगरपालिका वडा नं २ स्थित खेलमैदानमा हुने प्रतियोगिता सम्पन्न गर्न ३४ लाख ३० हजार रुपैया खर्च हुने बताइएको छ ।
प्रतियोगितामा सहभागी टिमका खेलाडीहरुलाई यातायात, खाना र बसोबासको समेत ब्यवस्थापन आयोजकबाट गरिएको जानकारी दिए ।
यसैगरी खेलाडीलाई १ लाख सम्मको दुर्घटना बिमा गरिएको, प्रतियोगिताको मुख्य प्रायोजकलाई ५ लाख तथा सहप्रायोजनको ३ लाख रुपैया तथा ब्यानरमा १५ हजार रुपैया तोकिएको जानकारी दिए ।
