काठमाण्डाै - एएफसी एसियन कपमा आयोजक कतारले विजयी शुरूवात गरेको छ । प्रतियोगिताको उद्घाटन खेलमा घरेलु टोली कतारले लेबनानलाई ३–० गोलले हरायो ।
विश्वकपको फाइनल खेल भएको मैदान लुसेलमा घरेलु टोलीले खेलको पहिलो हाफमा एक र दोस्रो हाफमा दुई गोल गर्यो । उसका अक्रम अफिफले २ र अल्मोएज अलिले एक गोल गरे । कतार साविक विजेता टोली हो ।
फिफा विश्व कप आयोजना गरेको डेढ वर्षमै कतारले एसियन कपको १८औँ संस्करण आयोजना गरेको हो । सन् २०२३ मा चीनमा हुने भनिएको प्रतियोगिता कोरोनाका कारण कतारमा सारिएको थियो ।
प्रतियोगितामा एसियाका २४ देश प्रतिस्पर्धामा छन् । २४ देशलाई ६ समूहमा विभाजन गरिएको छ । आज तीन वटा खेल हुनेछन् ।
आजको पहिलो खेलमा बेलुका सवा ५ बजे समूह ‘बी’ को अष्ट्रेलिया र भारत खेल्नेछन् । त्यस्तै, समूह ‘ए’ को चीन र ताजकिस्तानबीच सवा ८ बजे खेल हुनेछ । राति सवा ११ बजे समूह ‘बी’ को सिरिया र उज्वेकिस्तान खेल्नेछन् ।
