बुटवल। खेतीयोग्य जमीनको उर्बरता शक्ति हराउँदै गएकाले उत्पादनमा ह्रास आएको तिलोत्तमाका किसानहरुको गुनासो छ । बुटवल बजारको फोहोर सुखौरा खोलामा फाल्ने भएकाले खेतबारीमा त्यसको असर पर्ने गरेको किसानहरुको भनाई छ ।
जसले गर्दा खेती गर्ने किसानहरुमा निराशा छाउँदै गएको छ, किसान रामनारायण चौधरीले बताउनु भयो । उहाले भन्नुभयो,' रुपन्देहीको तिलोत्तमा नगरपालिका वडा न ११ मद्रहानी मौजाका सबैभन्दा किसानहरुले समस्या भोग्नु परेको छ ।'
पछिल्लो समय बुटवलको बजारीकरण फस्टाउँदै जानु र जनघनत्व पनि बढ्नाले ती मानिसहरुले खोलामा फाल्ने फोहोर तिलोत्तमामा प्रत्यक्ष असर पुगेको अर्का किसान गणेश पाण्डे बताउँनुहुन्छ। सिँचाइ प्रणालीमा बढ्दै गएको प्रदूषणले खेतीयोग्य जमिन रुखो बन्दै गएको दुखेसो किसानहरुको छ ।
किसानहरु भन्छन्, 'कुलोमा फालिएका फोहोर पदार्थले खेतबारीको उर्बर माटोलाई बिगार्दै गएकाले उत्पादनमा बर्सेनि गिरावट आएको छ ।
खेती गर्दा प्लास्टिक लगायत नगल्ने वस्तुहरु भेटिन्छन् ।जोखिम मोलेर खेती गर्नुपर्छ । यो समस्यालाई हल गर्नका लागि स्थानीय सरकारसँग धेरैपटक जानकारी गरायौं सुनुवाई भएन।'
मद्रहानी मौजाका अध्यक्ष मोहनलाल ज्ञवालीले बुटवल बजारको फोहर, छाडा चौपाया, अव्यवस्थित बसोबासले कुलो मासिदै जानुले किसानमाथि अन्याय भएको जिकिर गर्नुभयो।
