गुल्मी । गुल्मीको रेसुङ्गा विमानस्थलमा हप्ताको चारपटक उडान हुने भएको छ । हाल हप्तामा दुई पटक मात्रै उडान हुँदै आएकामा आगामी फागुनको पहिलो हप्ताबाट चार पटक उडान हुनेगरि व्यवस्था मिलाइएको हो ।
अहिले बुधबार र शुक्रबार गरी हप्ताको दुई दिन उडान भइरहेको छ । यात्रुको चाप अत्याधिक नै भएका कारण हप्ताको चार दिन उडान गर्ने गरी तयारी भइरहेको रेसुङ्गा नगरपालिकाका प्रमुख खिलध्वज पन्थीले जानकारी दिनुभयो । यसका लागि नेपाल नागरिक उड्यन प्राधिकरण तथा नेपाल वायुसेवा निगमसँग पुनःसम्झौता गर्ने तयारी गरिएको उहाँले बताउनुभयो ।
विमानस्थलको उद्घघाटन निजी क्षेत्रको बिमानबाट भएको भएतापनी यात्रुको अभाब हुने कारण देखाउदै प्राईभेट कम्पनीले उडान गर्न नमानेपछि नेपाल वायुसेवा निगम संग रेसुङ्गा नगरपालिकाले घाटा व्यहोर्ने सम्झौता गरेपछि गत वैशाख २९ गते पहिलो व्यावसायिक उडान बाट नियमित उडान सुरु भएको हो ।
विमानस्थलको धावनमार्ग छोटो भएका कारणले १५ सीट क्षमताको सानो ट्वीनेटर विमानले सेवा दीएको छ । यात्रुको चाप बढि भएको तर उडान कम भएकाले अत्याबश्यक कामका यात्रुसमेत सेवाबाट बन्चित हुनुपरेको जनताको गुनासो रहेको छ ।
हालसम्म ६४ उडान भएका छन् । यसबाट आठ सय १५ यात्रुले सेवा लिएका छन् । जहाजमा अधिकांश गम्भीर रोगका बिरामी, ज्येष्ठ नागरिक र अशक्त नागरिकले सेवा लिएका छन् ।
