काठमाडौँ । राजधानीमा जारी प्रधानमन्त्री कप राष्ट्रिय क्रिकेट प्रतियोगितामा नेपाल पुलिस क्लबले मधेश प्रदेशलाई पराजित गर्दै प्रतियोगितामा पाँचौँ जित दर्ता गराएको छ ।
मूलपानी क्रिकेट मैदानमा आज भएको खेलमा पुलिसले मधेशमाथि ६ विकेटको जित निकाल्दै प्रतियोगितामा पाँचौँ जित दर्ता गराएको हो ।
पुलिसले ५ खेलमा १० अङ्क जोड्दै अङ्क तालिको शीर्ष स्थानमा यथावत् छ । यता मधेशले ७ खेलमा ८ अङ्क जोडेको छ । मधेश अङ्क तालिकाको तेस्रो स्थानमा छ ।
धेशले प्रस्तुत गरेको ९७ रनको समान्य लक्ष्य पुलिसले १८ दशमलव ३ ओभरमा ४ विकेट गुमाउँदै पूरा गर्यो । पुलिसका लागि सुनिल धमलाले सर्वाधक २८ रनको योगदान दिए ।
त्यस्तै कुशल भुर्तेलले १९, आरिफ शेखले अविजित १६ र अमृत श्रेष्ठले अविजित १५ रन बनाए । मधेशका लागि रञ्जीत कुमार र अर्निको यादवले समान दुईरदुई विकेट लिए ।
त्यसअघि टस हारेर पहिला ब्याटिङको निम्तो पाएको मधेशले २४ ओभरमा सबै विकेट गुमाउँदै ९६ रनको योगफल बनाएको थियो । मधेशका लागि अर्निको यादवले २३, कप्तान हरिशङ्कर शाहले २२ र अभिशेक तिवारीले अविजित ११ रन बनाए ।
पुलिसका लागि सागर ढकालले पाँच विकेट लिए भने ललितनारायण राजवंशीले चार विकेट झारे । त्यस्तै राशिद खानले एक विकेट लिए ।
त्यस्तै कीर्तिपुरस्थित त्रिवि क्रिकेट मैदानमा आज भएको अर्को खेलमा कोशी प्रदेश सुदूरपश्चिमसँग आठ विकेटले पराजित भएको हो। कोशीले दिएको १२४ रनको लक्ष्य सुदूरपश्चिमले २१.१ ओभरमै दुई विकेट गुमाएर पूरा गरेको हो।
सुदूरपश्चिमका लागि नरेन भट्टले अर्धशतक प्रहार गरे। उनले ४९ बलमा ५४ रन बनाए। त्यस्तै, प्रकाश पाण्डेले ३४, राजु रिजालले २१ र खडक बोहराले नौ रन बनाए। कोशीका लागि फिर्दोष अन्सारीले दुई विकेट लिए। कम स्कोरको खेलमा कोशीका अन्य बलरले विकेट लिन सकेनन्।
यसअघि ब्याटिङ गरेको कोशीले ३२ ओभरमा सबै विकेट गुमाएर १२३ रन बनाएको थियो। कोशीका लागि मीनश थापाले २६, अङ्कित सुवेदीले २२, कमल खत्रीले १८ र फिर्दोष अन्सारीले १३ रन बनाए। अन्य खेलाडीले दोहोरो अंक पनि जोड्न सकेनन्।
सुदूरपश्चिमका लागि शेर मल्लले पाँच र विकास आग्रीले चार विकेट लिए। मल्लले ६ ओभरमा २८ रन र आग्रीले सात ओभरमा नौ रन खर्चिए। यो जितसँगै सुदूरपश्चिम आठ अंक जोडेर अंक तालिकको दोस्रो स्थानमा पुगेको छ। कोशीले भने अहिलेसम्म अंक जोड्न सकेको छैन। प्रतियोगिताबाट बाहिरिसकेको कोशीको एक खेल मात्रै बाँकी छ।
