काठमाडौँ । नेपाली कांग्रेसले ७८ औं स्थापना दिवसका अवसरमा प्रजातन्त्र प्राप्तिका लागि बिभिन्न कालखण्डमा योगदान पुर्याउने अग्रज नेताहरुलाई सम्मान गरेको छ ।
शुक्रबार पार्टी कार्यालय सानेपामा आयोजित एक कार्यक्रमकाबीच कांग्रेसले पार्टीको स्थापनाकालका सदस्य तथा प्रजातन्त्र प्राप्तिका लागि बिभिन्न कालखण्डमा योगदान पुर्याउने योग प्रसाद उपाध्याय र नुतन थपलियालाई सम्मान गरेको हो ।
कार्यक्रममा कांग्रेस सभापति शेरबहादुर देउवाले प्रजातन्त्र प्राप्तीका लागि योगदान पुर्याउनेहरुलाई सदैव स्मरण गर्नुपर्ने बताउनुभयो । उहाँले प्रजातान्त्रीक योद्धाहरुका बारेमा सवै नेपालीहरुलाई जानकारी गराउनुपर्ने धारणा राख्नुभयो ।
त्यस्तै कांग्रेस उपसभापति धनराज गुरुङले देश निर्माणका लागि अग्रजहरुले खेलेको भूमिकाको स्मरण गर्दै अहिले देश निर्माणका लागि योजनाका साथ अघि बढ्नुपर्ने बेला आएको बताउनुभयो ।
त्यस्तै कांग्रेस महामन्त्री गगन कुमार थापाले भुइँमा बसेके मान्छेलाई माथि उठाउने र देशको हितमा काम गर्ने कांग्रेसको दायित्व भएको बताउनुभयो । शनिबारबाट कांग्रेसले समुदायमा कांग्रेस अभियान सुरु गर्ने जानकारी दिदै उहाले सबै क्रियाशील सदस्यलाई वडामा हुने कार्यक्रममा निर्देशन दिनुभयो ।
भारतको कलकत्तामा नेपाली राष्ट्रिय कांग्रेसको पहिलो अधिवेशन भएको मिति २००३ माघ १२ गतेलाई आधार मानेर कांग्रेसले हरेक वर्ष स्थापना दिवस मनाउँदै आएको छ ।
स्थापना दिवस मनाए लगत्तै शनिबारबाट नेपाली कांग्रेसले ‘समुदायमा कांग्रेस’ अभियान पनि सञ्चालन गर्दैछ ।‘समुदायमा जाऔं, जनताका कुरा सुनौं’ नारासहित गाउँ जाने र जनताका सुझाव र गुनासा सुन्ने गरी अभियान सञ्चालन गर्ने कांग्रेसले जनाएको छ ।
