अर्घाखाँची । सस्कृति पर्यटन तथा नागरिक उड्यन राज्यमन्त्री सुशिला श्रीपालीले खेलको माध्यमबाट जिल्लालाई राष्ट्रिय तथा अन्तराष्ट्रिय रुपमा चिनाउन सहयोग पुग्ने बताउनुभएको छ ।
अर्घाखाँचीको सन्धिखर्कमा आजबाट सुरु भएको १३ औं राष्ट्पति रनिङ शिल्ड प्रतियोगिताको उद्घाटन गर्दै मन्त्री श्रीपालीले यस्तो बताउनुभएको हो ।
खेलले मानिसको चौतर्फी विकासमा सहयोग गर्ने भएकाले राज्यले खेल क्षेत्रको विकासमा ध्यान दिनुपर्नेमा जोड दिनुभयो । अर्घाखाँचीमा खेलको विकास गर्न प्रशस्त सम्भावना रहेकोले खेल क्षेत्रको विकास गर्न सके खेल तथा पर्यटनमा समेत टेवा पुग्ने उहाँको भनाइ छ ।
खेलकुदले मानिसको शारीरिक,मानसिक तथा सामाजिक बिकास गर्दै देश तथा बिदेशमा चिनाउन महत्वपुर्ण भुमिका खेल्ने भएकाले खेलकुदमा लाग्न सबैलाई आग्रह समेत गर्नुभयो ।
सन्धिखर्कको टुडिखेलमा माघ १४ बाट सुरु भएको खेल १६ गतेसम्म चल्ने खेलकुद विकास समितीका अध्यक्ष बिष्णु क्षेत्रीले जानकारी दिनुभयो । जिल्लाका छ वटै पालिकाबाट बिभिन्न बिधामा करीब एक सय खेलाडीको सहभागिता रहेको छ ।
