काठमाडौँ । नेपाली कांग्रेसका महामन्त्री गगन कुमार थापाले जनतामा गुम्दै गइरहेको विश्वासलाई भरोसामा बदल्न सरकार जिम्मेवारीपूर्वक अघि बढ्नुपर्ने बताउनुभएको छ ।
बुधबार प्रतिनिधिसभाको बैठकमा बोल्दै थापाले अदालत, प्रहरी, प्रशासन, दल, वित्तीय संस्थाप्रति जनताको भरोसा गुम्दै गएको भन्दै जनताको भरोसा कायम गर्न सरकारले सबैभन्दा बढी जिम्मेवारी लिनुपर्ने बताउनुभएको हो ।
आम नागरिकहरूले केही परिवर्तन भएको महसुस गर्ने गरि संसद र सरकारले आआफ्नो जिम्मेवारी निर्वाह गर्नुपर्ने उहाँले बताउनुभयो । उहाँले सरकार नयाँ ढंगले काम गर्छु भनिराख्दा संसदीय समितिलाई समेत फरक ढंगले चलाउनुपर्ने धारणा राख्नुभयो ।
थापाले जतिसुकै शक्तिशाली भए पनि सरकारी जग्गा हडप्नेलाई कारबाही गर्नुपर्नेमा जोड दिनुभयो । सहकारीमा ठगीको धन्दाको मतियारलाई समेत कारवाही गर्दै जनतामा सुशासनको अनुभूति दिलाउनुपर्ने उहाँले बताउनुभयो ।
त्यस्तै थापाले रुसमा अलपत्र परेका युवाहरूलाई फर्काउन सरकारले गरेका प्रयास अप्रयाप्त भएको बताउनुभयो । रुसमा अलपत्र परेका नेपालीहरूको उद्दारमा राज्यले सम्पूर्ण ताकत लगाउनुपर्ने उहाँको भनाइ छ ।
