अर्घाखाँची । अर्घाखाँचीको सन्धिखर्कदेखि बुटवल रुटमा विद्युतीय गाडि चलेका छन् । डिजेल तथा पेट्रोलवाट चल्ने गाडी मात्र हिंड्ने अर्घाखाँचीको सडकमा अहिले विद्युतीय गाडी चल्न सुरु भएका छन् ।
जिल्लाको सन्धिखर्क, खनदह, असुरकोट, ढाकाबाङ्ग देखि सन्धिखर्क हुँदै बुटवलसम्म दैनिक विजुली गाडी चलिरहेका छन् । विद्युतीय गाडीमा डिजेल तथा पेट्रोल गाडीको तुलनामा भाडा पनि कम लाग्ने भएको छ ।
विजुलीबाट चल्ने गाडीमा पहाडको बाटोमा प्रति किलोमिटर ६ रुपैयाँ र तराईको बाटोमा ३ रुपैयाँ प्रति किलोमिटरका दरले भाडा निर्धारण गरिएको छ ।
सन्धिखर्क देखि अब बुटवल ४ सय ८० रुपैयाँमा पुग्न सकिन्छ । अर्घा भगवती यातायात प्रा लि ले अर्घाखाँचीमा विद्युतीय गाडीको सुरुवात गरेको हो ।
यहाँको बाटोमा विद्युतीय गाडिको परीक्षण गरी सफल भएपछि विद्युतीय गाडी सञ्चालनमा ल्याईएको प्रा लि का महासचिव कुशल भुसालले जानकारी दिनुभयो ।
विद्युतीय गाडीमा न्यूनतम भाडादर निर्धारण गरिएको छ, गाडीमा फ्रि बाईफाइको व्यवस्था छ, यात्रुले गाडीमा विभिन्न सामाजिक सञ्जाल चलाउन सक्नेछन् ।
यस्तै यात्रुको सुरक्षालाई मध्यनगर गर्दै गाडीमा सीसी टिभीको पनि व्यवस्था गरिएको ,जिपीयस जडान गरिएकोले गाडी कहाँ रोकियो भनेर हेर्न सकिने भुसालले बताउनुभयो ।
जिल्लामा नयाँ व्यवस्थापनका साथ विद्युतीय गाडी सञ्चालनमा ल्याएका छौ, अहिले तत्काल अर्घाखाँची बुटवल चलिरहेका छन्,’ उहाले भन्नुभयो अब छिट्टै कृष्णनगर, दाङ लगायतका ठाउँमा सञ्चालन गर्ने तयारीमा छौ, जिल्लाका पनि धेरै ठाउँबाट विद्युतीय गाडी सञ्चालन गर्ने लक्ष्य छ ।
अर्घा भगवती यातायात प्रा लि ले १५ वटा र पश्चिम नेपाल यातायात प्रा.ली.ले ४ वटा विजुली गाडी सञ्चालनमा ल्याएका छन् । यात्रुहरुले पनि विद्युतीय गाडीमा यात्रा गर्न सहज र आरामदायी भएको बताउनुभयो।
सन्धिखर्कबाट बुटवलसम्म विद्युतीय गाडीमा यात्रा गर्दा गन्ध पनि नआउने र बान्ता हुने सम्भावना पनि कम हुने यात्रु अशोक पौडेलको भनाई रहेको छ । उहाँले भाडा पनि सस्तो भएकाले अब सवैले विद्युतीय गाडीलाई प्रोत्साहन गर्नुपर्ने बताउनुभयो ।
धुँवारहित भएकाले बाताबरण प्रदूषण हुनबाट जोगिन्छ’ ‘वातावरणलाई स्वच्छ राख्नलाई पनि विद्युतीय गाडीको प्रयोग बढाउनुपर्छ पौडेलको भनाई छ । सन्धिखर्कको बसपार्क र सन्धिखर्क– गोरसिङ्गे सडकको भेडामारेमा चार्जिङ स्टेशन राखिएको छ ।
