काठमाडौं । आईसीसी विश्व लिग-२ अन्तर्गतको खेलमा नामिबियालाई हराउँदै नेदरल्याण्डले पहिलो जित निकालेको छ । आज भएको खेलमा नेदरल्याण्डले नामिबियालाई ७ विकेटले हरायो ।
नामिबियाले दिएको १२४ रनको सामान्य लक्ष्य नेदरल्याण्डले २७.२ ओभरमा ३ विकेट गुमाएर पूरा गर्यो ।नेदरल्याण्डका लागि मिचेल लेभिटले अर्धशतक प्रहार गरे ।
८१ बलमा ८ चौका र २ छक्कासहित उनले ५७ रन जोड्दा म्याक्स वर्डवाड्ले २८ रन थपे । वासडि लिडेले २१ रन नटआउट थप्दा नेदरल्याण्डले ८ रन अतिरिक्तमा पायो ।
नामिबियाका लागि ग्रिहार्ड इरामसले तीन विकेट लिए । यो जितसँगै नेदल्याण्डले २ खेलबाट २ अंक जोड्दै अंक तालिकाको तेस्रो स्थानमा रहँदा रनरेटका आधारमा नेपाल भने शीर्ष स्थानमा उक्लिएको छ । नेपालले २ खेलबाट समान २ अंक जोडपनि नामिबियालाई पछि पार्दै शीर्ष स्थानमा उक्लिएको हो ।
यसअघि आर्यन दत्तले घातक बलिङ गर्दै ६ विकेट लिएपछि नामिबिया ३५.१ ओभरमा १ सय २३ रन बनाउँदै अलआउट हुन पुगेको थियो । दत्तले ९ ओभर बलिङ गर्दै ३४ रन खर्चेर ६ विकेट लिए ।
