काठमाडौँ । नेपाली कांग्रेसले निराशा बेच्दै काल्पनिक सपनाको हावाहुरीमा परिवर्तन उल्टाएर एकाधिकार लाद्न खोज्नु अधिनायकवाद भएको जनाएको छ ।
ललितपुरमा जारी कांग्रेसको महासमिति बैठकमा मंगलबार उपसभापति पूर्णबहादुर खड्काले प्रस्तुत गर्नुभएको नीति प्रतिवेदनमा अधिनायकवादीहरू रूपमा भिन्न देखिएता पनि सारमा लोकतन्त्र बिरोधी नै भएको र उनीहरूको प्राप्त उपलब्धिमा कुनै अपनत्व नरहेको समेत उल्लेख गरिएको छ ।
भर्खरै स्थिरताको लय समात्दै गरेको लोकतान्त्रिक शासन व्यवस्थाको विरुद्धमा घृणाको राजनीति र त्यही घृणाको आवरणमा केही तत्वहरू फेरि अधिनायकवाद लाद्ने असफल दुष्प्रयास गरिरहेको उपसभापति खड्काले बताउनुभयो ।
उहाँले राजनीतिक दल र सरकारको काम गर्ने तौरतरिका तथा शैलीप्रति आम नागरिकको गुनासो, असन्तुष्टि तथा चित्त दुखाइ रहेपनि यस्ता समस्यालाई व्यवस्थासँग जोडेर परिवर्तन विरुद्ध आवाज उठाउने काम गैरजिम्मेवार र असान्दर्भिक सोच भएको जिकिर गर्नुभयो ।
अबको दिनमा कांग्रेसको राष्ट्रियता, लोकतन्त्र र समाजवादको मूलभूत मान्यताको जगमा आवश्यक नीति तथा कार्यक्रम तर्जुमा गरी प्रभावकारी ढङ्गले प्रत्येक व्यक्तिको चासो, सरोकार, आवश्यकता र चाहनालाई सम्बोधन गर्न पार्टी प्रतिवद्ध रहने नीति प्रतिवेदनमा उल्लेख छ ।
स्वास्थ्य शिक्षा जस्ता संविधानमा रहेका अधिकारहरुलाई स्थापीत गर्न कांग्रेसले पहलकदमी भूमिका निर्वाह गर्नुपर्ने उपसभापति खड्काले बताउनुभयो ।
कांग्रेसको इतिहास र संविधानमा भएको व्यवस्था अनुरूप सार्वजनिक स्थलका अलावा निजी तथा धार्मिक एवं सांस्कृतिक स्थलहरूमा हुने जातीय विभेद अन्त्यका लागि कांग्रेसका सदस्यहरूले आगामी दिनमा नेतृत्वदायी भूमिका निर्माण गर्ने नीति तय गरिने उहाले बताउनुभयो ।
उहाँले मधेशी दलित समुदायलाई पार्टीको केन्द्रीय समिति लगायतका राज्यक निकायमा सहभागिता बढाउन उत्प्रेरित गर्ने नीति तय गरिने धारणा राख्नुभयो ।
त्यस्तै नीति प्रतिवेदनमा पार्टी स्थापनाकालदेखि अंगीकार गर्दै आएको विदेश नीतिक मार्गनिर्देशक सिद्धान्त तथा बी. पी. कोइरालाको सरकारले अख्तियार गरेको स्वतन्त्र विदेश नीतिलाई मूलमन्त्र मान्दै कांग्रेसले नेपालको राष्ट्रहित र राष्ट्रिय स्वार्थलाई उच्च प्राथमिकता दिँदै आएको र भविष्यमा पनि यही नीतिलाई निरन्तरता दिने उल्लेख छ ।
उपसभापति खड्काले वी.पी. कोइराला लगायतका संस्थापक नेता र जनताको इच्छा, अपेक्षा र दृढता अनुरुप नयाँ युगले दिने नयाँ नयाँ समस्याको तर्कपूर्ण समाधान खोज्दै सभ्य, सुसंस्कृत तथा समतामूलक नेपाल निर्माणका लागि काँग्रेस प्रतिबद्ध रहेको जिकिर गर्नुभयो ।
