अर्घाखाँची । अर्घाखाँचीको सन्धिखर्क नगरपालिका वडा नं १२ स्थित ज्ञान प्रकाश माध्यमिक विद्यालयले Pre see र pre Ble -२०८० को नतिजा विश्लेषण सँगसँगै सिकाई उपलब्धि वृद्धिका लागि शैक्षिक अन्तर्क्रिया कार्यक्रम सम्पन्न गरेको छ।
विद्यालय व्यवस्थापन समितिका अध्यक्ष काशीराम बस्यालको अध्यक्षता, शिक्षा विकास तथा समन्वय इकाई प्रमुख मनिराम पराजुलीको प्रमुख आतिथ्यता रहेको कार्यक्रमको सञ्चालन विद्यालय शिक्षक चिरञ्जीवी भुसालले गर्नुभएको थियो।
९१ जना विद्यार्थी र ९० जना अभिभावकको उपस्थिति रहेको कार्यक्रममा विषयगत शिक्षकहरुबाट विद्यार्थीको अवस्था विश्लेषण गरिएको थियो।
साथै विद्यालयका प्रधानाध्यापक सूर्य बहादुर खनालले विद्यालयको समग्र अवस्था,विद्यालयप्रति अभिभावकको दायित्व र विद्यार्थीको कर्तव्यका बारेमा जानकारी दिनुभएको थियो।
शिक्षा विकास तथा समन्वय इकाई प्रमुख मनिराम पराजुलीले विद्यालयले हालसम्म गरेका कामको प्रशंसा गर्दै यस कार्यक्रमले थप इटा थप्न सहयोग गर्ने बताउनुभयो । अन्तर्क्रिया कार्यक्रममा सबैले आ-आफ्ना विचार प्रस्तुत गर्नुभएको थियो।
