रुपन्देही । कञ्चन गाउँपालिका रुपन्देहीको आयोजनामा कञ्चनका जनप्रतिनिधि र कर्मचारीहरुका लागि दुई दिने क्षमता विकास सम्बन्धि तालिम शुक्रवारदेखि सुरु भएको छ ।
बुद्धभूमि कन्सलटिङ्गको व्यवस्थापनमा भएको तालिम उदघाटनका अवसरमा बोल्दै कञ्चन गाउँपालिकाका अध्यक्ष नवराज ढकालले तीनै तहका जनप्रतिनिधिहरुमा अध्ययनको कमीले धेरै समस्या आएको बताउँदै जनप्रतिनिधि र कर्मचारीहरुले आफूहरुले गर्ने कामहरुको बिषयमा अध्ययन गर्नैपर्ने बताउनुभयो ।
उहाँले जनप्रतिनिधि र कर्मचारीहरुले आफ्नो बिषय क्षेत्रभित्र अध्ययन नगर्दा धेरै समस्या आएको बताउँदै यस किसिमका तालिमले समस्या सहजीकरणमा धेरै सहयोग पुग्ने विश्वास ब्यक्त गर्नुभयो ।
क्षमता विकास तालिममा प्रशासनबीद काशीराज दाहालले प्रशिक्षण दिनुभएको छ । तालिममा जनप्रतिनिधी, कर्मचारी लगायत स्थानीय गरी ६० जनाको सहभागिता रहेको छ । शुक्रवारको तालिममा स्थानीय तहका काम, कर्तब्य र अधिकारका बिषयमा जनप्रतिनिधि, कर्मचारीहरुसंग सहजीकरण गरिएको हो ।
कञ्चन गाउँपालिकाका अध्यक्ष नवराज ढकालको अध्यक्षतामा भएको कार्यक्रममा उपाध्यक्ष मौसमी थापा मगरले पनि बोल्नुभएको थियो भने प्रमुख प्रशासकीय अधिकृत सागर गौतमले कार्यक्रमको औचित्यको बिषयमा प्रकाश पार्नुभएको थियो । कार्यक्रमको संचालन सूचना अधिकारी गिरिराज अर्यालले गर्नुभएको थियो ।
