अर्घाखाँची । अर्घाखाँचीमा नेपाली कांग्रेस, माओवादी, जनमोर्चा, एकीकृत समाजवादी लगायतका दलहरूले गठबन्धन गरी नेकपा एमाले विरुद्ध चुनावी मैदानमा होमिएपनी नेकपा एमालेका उम्मेद्वार टोपबहादुर रायमाझीको संसदयात्रा रोकिएन ।
वि.स.२०६४, २०७०, २०७४ हुँदै २०७९ को निर्वाचनमा समेत उनलाई कसैले छेक्न सकेन । फलस्वरुप उहाँले चौथोपटकपनी सांसद पदको शपथ लिनुभयो ।
निर्वाचित भएको करिव ५ महिना मै टोपबहादुर रायमाझी विरुद्ध नक्कली शरणार्थी बनाएर नेपालीलाई अमेरिका लैजाने प्रकरणमा संलग्न रहेको आरोपमा २०८० वैशाख २० गते पक्राउ पुर्जी जारी भयो । रायमाझि २०८० वैशाख ३१ गते साँझ काठमाडौंको बूढानीलकण्ठस्थित पासीकोटबाट पक्राउ पर्नुभयो ।
रायमाझी सहित पक्राउ परेकाहरूलाई चारवटा कसुरमा २८ करोड ८१ लाख रुपैयाँ बिगो, ठगिएको रकम फिर्ता र कैद सजाय मागदाबीसहित मुद्दा दर्ता भएको थियो । मुद्दा दायर भएको २ दिनपछि जेठ १२ बाट अदालतले अभियुक्तहरूसँग थुनछेक बहस अघिको बयान लिएको थियो ।
जेठ १९ मा बयान टुंग्याएकोमा त्यसको दुई दिनपछि २१ गतेबाट थुनछेक बहसका लागि इजलास बसेको थियो ।त्यसको भोलिपल्ट २२ गतेबाट ३ दिनसम्म सरकारी वकिलले मुद्दाको पक्षमा बहस गरेकामा भोलिपल्टदेखि प्रतिवादीतर्फको कानुन व्यवसायीहरूले बहस गरेका थिए । प्रतिवादीका कानुन व्यवसायीहरूको बहस जेठ ३२ गते टुंगिएको थियो ।
नेपालीलाई नक्कली भुटानी शरणार्थी बनाई अमेरिका पठाउन रचिएको अपराधका रायमाझी सहितका १६ अभियुक्तलाई मुद्दाको किनारा नलागेसम्म पुर्पक्षका लागि कारागार पठाउन जिल्ला अदालतले २०८० असार १ आदेश दियो ।
टोपबहादुर रायमाझी पुर्पक्षका लागि थुनामा गएसँगै प्रतिनिधिसभा नियमावलीको नियम २४८(३) अनुसार उहाको प्रतिनिधिसभा सदस्य पद निलम्बित भयो ।
समानुपातिक तर्फ बिजुला रायमाझि र शुसिला श्रीपाली सांसद रहेतापनी एकमात्र संघिय निर्वाचन क्षेत्र रहेको अर्घाखाँची जिल्लामा प्रत्यक्ष निर्वाचित प्रतिनिधी नहुदा विकासनिर्माणले गतीलिन नसकेको जिल्लावासीको गुनासो छ ।
उहाँ निलम्बनमा परेको यो पहिलोपटक भने होइन । यसअघि पनि उहाँको २० महिना अवधि खाली रहेको थियो । एमाले र माओवादी मिलेर बनेको नेकपा विभाजित हुँदा उहाँ एमाले खेमामा रहनुभएको थियो ।
उहाँ पहिले संलग्न रहेको पार्टी नेकपा माओवादी केन्द्रले पार्टीको साधारण सदस्य नरहनेगरी कारबाही गरेपछि २०७७ चैत्र २६ गते संसद् सचिवालयले सांसद पदबाट हटाएको थियो । त्यसपछिको २० महिना अर्घाखाँची प्रतिनिधिसभा प्रत्यक्ष सांसदविहीन भएको थियो ।
अघिल्लो कार्यकालमा रायमाझीको सांसद पद खारेज हुँदा २० महिना रिक्त रहेको निर्वाचन क्षेत्र यसपटक पूरै अवधि रिक्त रहने हो कि भन्ने शंका छ ।
उहाँसँगै हिरासतमा रहेका पूर्वगृहमन्त्री बालकृष्ण खाँड र रायमाझीका छोरा सन्दीप रायमाझी थुनामुक्त हुँदासमेत उहाँ थुनामै रहनुले यसपटकको पूरै कार्यकाल संघीय प्रतिनिधिविहीन हुने हो कि भन्ने चिन्ता जिल्लावासीमा बढेको छ ।
