गुल्मी । आधारभूत स्वास्थ्य सेवा केन्द्रको भवनबाट सेवा प्रवाह गर्दै आइरहेको रेसुंगा नगरपालिका-३ भाडगाउँको वडा कार्यालयको भवन निर्माण कार्य सुरु भएको छ।
वडा कार्यालयको भवन निर्माणका लागि शनिवार गुल्मीको रेसुङ्गा नगरपालिका–३ भाडगाउँमा नगर प्रमुख खिलध्वज पन्थीले एक कार्यक्रमका बीच शिलान्यास गर्नुभएको हो।
भवन शिलान्यास कार्यक्रममा बोल्दै रेसुङ्गा नगरपालिकाका नगरप्रमुख शिलान्यास गर्दै खिलध्वज पन्थीले नगरपालिका सधैँ नागरिकको पक्षमा रहेर काम गरिरहेको र अबका दिनमा पनि गर्ने प्रतिबद्धता ब्यक्त गर्नुभयो।
उहाँले नागरिकको हित विपरीत नगरपालिकाले कुनै पनि कार्यक्रम नगरेको बताउदै नगर प्रमुख पन्थीले निर्माण व्यवसायीलाई गुणस्तरीय सहित समयमै कार्यालय भवन निर्माण गर्न आग्रह गर्नुभएको थियो।
नगरप्रमुख पन्थीले वडा कार्यालय निर्माणका लागि निःशुल्क जग्गा प्रदान गर्नुहुने समाजसेवी जग्गादाता डिलाराम मरासिनीलाई बधाईसहित धन्यवाद व्यक्त गर्नुभयो । नयाँ भवन निर्माण सम्पन्न भएसँगै सम्पूर्ण वडावासीले सहज एवं सुलभ रूपमा सेवा लिन पाउने विश्वास वडा अध्यक्ष बाबुराम खत्रीले व्यक्त गर्नुभयो ।
वडा कार्यालय भवन निर्माणका लागि स्थानीय समाजसेवी मरासिनीले एक रोपनीभन्दा बढी जग्गा निशुल्क प्रदान गर्नुभएको छ वडा अध्यक्ष खत्रीले बताउनुभयो । असार १५ गतेभित्र भित्र कार्य सम्पन्न गर्नेगरी जोग्मा विल्डर्ससँग सम्झौता भएको भवनको निर्माण लागत एक करोड २० लाख रहेको नगर उपप्रमुख अमृतादेवी कुँवरले बताउनुभयो ।
अपाङ्गमैत्री भवन निर्माण हुने भएको छ । १ हजार २ सय ७० स्क्वायर फिटमा भवन निर्माण हुन लागेको र पछि सभाहल समेत थप्न सकिने रेसुङ्गा नगरपालिकाका इन्जिनियर कृष्ण कोइरालाले बताउनुभयो।
सिलान्यास कार्यक्रममा उपप्रमुख अमृतादेवी कुँवर, नेपाली कांग्रेस गुल्मीका सहसचिव धर्मराज पाण्डे, वडा सदस्य तथा कार्यपालिका सदस्य र स्थानीय राजनीतिक दलका प्रतिनिधिको सहभागिता रहेको थियो ।
