गुल्मी । गुल्मीको मुसिकोट नगरपालिका-१ को जग्गामा लागेको आगो निभाउने क्रममा एक जना स्थानीयको मृत्यु भएको छ ।
मुसिकोट नगरपालिका– १ तल्लो पौदीस्थित सर्वोदय माध्यमिक विधालयको जग्गामा रहेको सल्लाघारीमा लागेको डढेलो निभाउने क्रममा लडेर गम्भीर घाइते भएका ५८ वर्षीय महले घर्तीको उपचारको क्रममा गुल्मी अस्पतालमा मृत्यु भएको जिल्ला प्रहरी कार्यालय गुल्मीले जनाएको छ ।
आगोको निभाउन गएको समयमा तलबाट ठूलो मुस्लो आफूतर्फ आएपछि लडेका घर्ती एक सय ५० मिटर तल खसेका थिए । घर्तीको टाउको लगायत शरीरको विभिन्न भागमा चोट लागेपछि उपचारका लागि गुल्मी अस्पताल ल्याइएको थियो ।
उपचारका लागि गुल्मी अस्पताल ल्याउन साथ डाक्टरहरूले घर्तीलाई मृत घोषणा गरेको जिल्ला प्रहरी कार्यालय गुल्मीका प्रवक्ता शंकर पोख्रेलले जानकारी दिनुभएको छ ।
प्रवक्ता पोख्रेलका अनुसार आगो नियन्त्रण गर्ने क्रममा सोही स्थानका ५२ वर्षीय रेशम थापा घाइते भएका छन् । घाइते थापाको उपचार गुल्मी अस्पताल तम्घासमा भइरहेको र उनको स्वास्थ्य अवस्था सामान्य रहेको प्रहरीले जनाएको छ।
प्रहरी प्रवक्ता पोखरेलका अनुसार स्थानीय र प्रहरीको सहयोगमा आगो पूर्ण रूपमा नियन्त्रणमा आएको र घटनाका सम्बन्धमा अनुसन्धान भइरहेको जानकारी दिनुभयो।
