गुल्मी l गुल्मीका विभिन्न ठाउँमा शुक्रबार देखि भिषण भइरहेको आगलागीबाट २ जना घाइते हुनुका साथै करोडौको सम्पति जलेर नष्ट भएको छ ।
आगालीमा परी ट्याक्टर चालक ईश्मा गाउँपालिका –१ उजुङका १९ वर्षीय हिमाल राना र जेसिबि चालक मुसिकोट नगरपालिका –७ पल्टारका २१ वर्षीय प्रेम राना घाइते भएका हुन् । उनीहरुको हात, खुट्टा र अनुहारमा जलेको जिल्ला प्रहरी कार्यालले जनाएको छ ।
यसै क्रममा शुक्रबार जिल्लाको गुल्मी दरबार गाउँपालिका वडा नम्बर–४ वीरबासमा रुन्खादह सामुदायिक जंगलमा लागेको आगोबाट नेपाल विधुत प्राधिकरणको सव-स्टेशन परिसरमा रहेका तारहरू जलेर नष्ट हुँदा डेढ करोड बढीको क्षति भएको नेपाल विधुत प्राधिकरण गुल्मी वितरण केन्द्रका प्रमुख अर्जुन पोखरेलले बताउनुभयो ।
आगलागीबाट जिल्लाका सम्पूर्ण क्षेत्रमा विद्युतिकरण गर्ने लक्ष्यले भण्डारण गरि राखेको तार लागायतका सामाग्री जलेर नष्ट भएको हो । शनिवार बिहानदेखि भएको आगलागीबाट गुल्मी जिल्लाको इस्मा गाउँपालिका–२ हस्तिचौरको सिदुन्खा,फेदिया,मैनडाँडा र इस्मा गाउँपालिका-४ दोहोलीको तिम्लेखर्कमा २० घर र १३ गोठ जलेर नष्ट भएका छन ।
इस्मा गाउँपालिका -२ मा रहेको सिदुन्खा रानी सामुदायिक बन र इस्मा गाउँपालिका-४ मा रहेको वर्लेघाट र चैया मखन्ने सामुदायिक बनमा लागेको आगो सो क्षेत्रमा फैलिदा करोडौको सम्पति जलेर नष्ट भएको र सयौ पशुपन्छीको मृत्यु भएको प्रहरीले जनाएको छ।
सिंगो गाउँमै आगलागी हुँदा २० घर, १३ गोठ र पशुचौपाया जलेको जिल्ला प्रहरी कार्यालय गुल्मीका प्रहरी प्रमुख एसपी राजन भुजेलले जानकारी दिए ।
आगो नियन्त्रणमा लिने प्रयास भएपनि अझै नियन्त्रणमा आइनसकेको र क्षतिको पूर्ण विवरण संकलन भइरहेको जानकरी सुचना अधिकारी तथा प्रहरी नायव उपरीक्षक शंकर पोख्रेलले दिनु भयो ।
जंगल नजिकै रहेको वस्तीमा आगो आउन थालेपछि प्रहरी, सेना लगायत स्थानीय बासिन्दाहरु वस्तीतर्फ आगो आउन नदिन प्रयासरत रहे पनि हावाहुरीका कारण आगो अझ फैलिने क्रममा छ ।
आगो नियन्त्रणका लागि स्थानीय
जनप्रतिनिधि,स्थानीयवासी,प्रहरी सहायक निरीक्षक विनय कुमार श्रीवास्तव, सशस्त्र प्रहरी बल नेपाल नम्बर ३७ गुल्मका हे.क्वा. गुल्मीबाट स.प्र.ना.उ.सन्दिप कार्की र नेपाली सेना संग्राम सार्दुल गुल्म तम्घासका सहसेनानी विकासजंग रायमाझीको सुरक्षा कमाण्डमा टोली उक्त क्षेत्रमा खटि आगो नियन्त्रणमा ल्याउने प्रयास गरिरहेको छ ।
रेसुङ्गा नगरपालिकाको दमकल समेत त्यहाँ पुगेर आगो नियन्त्रणमा सहयोग गरिरहेको छ।जंगलसगैं ति क्षेत्रमा करिब ५०/६० परिवारको बसोवास रहेको र प्रहरी,सेना रं स्थानीयले आगो निभाउने प्रयास गरे पनि हावाहुरीका कारण नियन्त्रण प्रयास सफल हुन नसकेको प्रहरीले जनाएको छ ।
अहिले सिदुङखामा लागेको आगो रानीवनमा झरेको छ । मैनाडाँडामा रहेका केही घरहरु समेत उच्च जोखिममा रहेको स्थानीय कमल खत्रीले बताए । उनका अनुसार सिदुङखा, रानीवन, बड्मान तिरबाट आगो फैलिएकाले मैनडाँडा समेत जोखिममा रहेको हो।
आगोका कारण फेदियामा समेत भौतिक क्षति पुगेको छ। प्रहरीका अनुसार अगालगीबाट एउटा ट्याक्टर जलेर क्षतिभएको छ । यस्तै गुल्मीदरबार गाउँपालिका –३ उरिंगडाडास्थित सितल सामुदायिक बनमा पनि आगलागी भएको छ । अहिले उक्त आगलागी बस्तिको नजिक आउन लागेको र नियन्त्रणको प्रयास भइरहेको प्रहरीले जनाएको छ।
आगोलागि नियन्त्रणका लागि नेपाल प्रहरी, सशस्त्र प्रहरी, स्थानीयहरू, दमकल सहित खटिएर आगो नियन्त्रणमा लिएको जिल्ला प्रहरी कार्यालय गुल्मीका प्रहरी नायव उपरीक्षक शंकर पोखरेलले बताउनुभयो ।
शनिवार मात्र गुल्मी जिल्लाका मुसिकोट नगरपालिका,इस्मा, गुल्मी दरवार, छत्रकोट,धुर्कोट,मालिका,रुरुक्षेत्र लगायतका स्थानीय तहका विभिन्न वडामा रहेका सामुदायिक र सार्वजनिक जंगलका एक दर्जन भन्दा बढी स्थानमा आगोलागी भैरहेको स्थानीयबासीले जनाकारी दिएका छन ।
