अमेरिका । नेपालले आईसीसी टी–२० विश्वकप २०२४ मा मंगलबार नेदरल्याण्ड्ससँग खेल्दैछ ।
खेल नेपाली समय अनुसार राति अमेरिकाको डालसमा ९ : १५ मा ग्राड प्रेरी क्रिकेट रंगशालामा सुरु हुनेछ । नेपाल नेदरल्याण्ड्सलाई हराउँदै शानदार सुरुवात गर्न चाहन्छ ।
विश्वकप हुँदा नेपालले आफ्नो उत्कृष्ट प्लेइङ–११ मैदान उतार्नेछ । कप्तान रोहित पौडेल र प्रशिक्षक मोन्टी देशाईलाई आफ्नो प्लेइङ ११ निर्धारण गर्न खासै कठिन हुनेछैन । किनभने पछिल्लो एक वर्षमा नेपालले आफ्नो उत्कृष्ट प्लेइङ ११ पत्ता लगाउन सम्भावित सबै परीक्षण गरेको छ ।
तयारी खेलमा क्यानडाविरुद्ध खेलबाट नेपालको टोलीमा एक परिवर्तन पक्का छ । घाइते दीपेन्द्रसिंह ऐरी क्यानडासँग खेल खेलेका थिएनन् । तर दीपेन्द्र फिट भइसकेका छन् । दीपेन्द्र टोलीमा फर्किदा अनिल साह र सन्दीप जोरामध्ये एक जना बाहिर रहनेछन् ।
टोली सन्तुलन मिलाउन सन्दीप जोरा बाहिर हुने देखिन्छ । सन्दीप जोरा मध्यक्रममा खेल्दै आएका छन् । दीपेन्द्र टोलीमा फर्किदा मध्यक्रममा सन्दीपको स्थान कठिन देखिन्छ । किनभने पाँचौं नम्बरमा दीपेन्द्रले खेल्नेछन् । त्यसपछि कुशल मल्ल र गुल्सन झा हुनेछन् ।
अर्कोतर्फ नेपालका ओपनर कुशल भुर्तेल र आसिफ शेखले पछिल्लो समय राम्रो गर्न सकेका छैनन् । खराब लयबाट उम्किन संघर्ष गरेका छन् । अनिलले पछिल्ला अभ्यास खेलमा राम्रो गरेका छन् । ओपनरको खराब लय हुँदा तेस्रो नम्बरमा अनिल खेल्ने देखिन्छ ।
क्यानडासँग अभ्यास र त्यसअघि ह्युस्टन हरिकेन्ससँग अनिलले दुई अभ्यास खेलमा तेस्रो नम्बरमा खेल्दै राम्रो प्रभाव छाडेका थिए ।
विकेटकिपर समेत हुँदा उनी किपिङमा आसिफको विकल्प हुनेछन् । त्यसैले अनिलले प्लेइङ ११ मा स्थान बनाउने सम्भावना देखिन्छ ।
नेपालसँग अर्को दुविधा सागर ढकाल र ललित राजवंशीमध्ये एक स्पिनर खेलाउनेमा हुनसक्छ । पहिलो रोजाइ र अनुभवी हुँदा ललितका साथ जाने देखिन्छ ।
तीव्र गतिका बलर प्रतिश जिसी र कमलसिंह ऐरी बेञ्चमा बस्ने निश्चितजस्तै देखिन्छ । किनभने तीव्र गतिका बलरमा सोमपाल कामी, करण केसी र अभिनाश बोहरा पहिलो खेलमा हुने देखिन्छ । पार्टटाइममा गुल्सन झा हुनेछन् । सोमपाल र करण पहिलो रोजाइ तथा अनुभवी बलर हुन् ।
अभिनाश डेथ ओभरमा नेपालको एक्लो विकल्प हुन् । त्यसैले पहिलो खेलमा प्रतिश र कमलको सम्भावना देखिदैन । स्पिनरमा दीपेन्द्रसिंह ऐरी र कुशल मल्ल पनि प्रमुख बलरको भूमिकामा हुनेछन् । पार्टटाइममा कुशल भुर्तेल र रोहित पौडेल हुनेछन् ।
आसिफ शेख र अनिल साहबाहेक अन्य सबै खेलाडी बलिङ गर्न सक्छन् । तीव्र गतिमा चार विकल्पका साथ मैदान उत्रने सम्भावना छ । स्पिनरमा परिस्थिति अनुसार ४–५ खेलाडी नेपालसँग विकल्प हुनेछ ।
ओपनर कुशल भुर्तेल र आसिफ शेखले राम्रो सुरुवात दिलाउनु पर्छ । त्यसपछि अनिल र रोहित हुनेछन् । यी दुई ब्याटर टोलीको आवश्यकता अनुसार आक्रामक र संयमित दुबै खेल्न सक्छन् । रोहितले ठूलो इनिङ खेल्नुपर्छ ।
त्यसपछि कुशल मल्ल, गुल्सन झा र करण केसीको भूमिका क्लिन हीट हुनेछ । खराब प्रदर्शन हुँदा सोमपाल माथिल्लो क्रममा पनि आउन सक्छन् । नेपाली ब्याटरले जिम्मेवारी र कमजोर बललाई ठूलो सट भने खेल्नुपर्छ ।
नेपालको सम्भावित प्लेइङ–११
कुशल भुर्तेल, आसिफ शेख (विकेटकिपर), अनिलकुमार साह, रोहित पौडेल (कप्तान), दीपेन्द्रसिंह ऐरी, कुशल मल्ल, गुल्सन झा, सोमपाल कामी, करण केसी, अभिनाश बोहरा र ललित नारायण राजवंशी ।
सम्भावित बेञ्च :
प्रतिश जिसी, कमलसिंह ऐरी, सन्दीप जोरा र सागर ढकाल ।
