गुल्मी । सोमबार राती गुल्मी र अर्घाखाँचीको सिमाना देउरालीमा ट्रिपर दुर्घटना हुँदा एक जनाको मृत्यु भएको छ भने दुई जना घाईते भएका छन ।
अर्घाखाँची जिल्लाको छत्रदेव गाउँपालिका-७ देउराली तम्घासको भित्रि कच्ची सडकमा ना ८ ख ६६४४ नम्बरको ट्रिपर सडकदेखि करिब ७० मिटर तल खस्दा त्यसमा सवार सन्धिखर्क नगरपालिका–८ खाँचीका २६ बर्षिय रामलाल पुरीको उपचारका क्रममा गुल्मी अस्पताल तम्घासमा गएराती मृत्यु भएको जिल्ला प्रहरी कार्यालय गुल्मीले जानकारी दिएको छ ।
सोही दुर्घटनामा परि छत्रदेव गाउँपालिका–७ का ३३ वर्षिय रिसभ केसी र सितगंगा नगरपालिका–२ का २९ वर्षीय नविन घिमिरे घाईते भएका छन ।
घाईते दुबै जनालाई गएराती नै गुल्मी अस्पतालले लुम्बिनी मेडिकल कलेज पाल्पा प्रभासमा रिफर गरेको जिल्ला प्रहरी कार्यालय गुल्मीका सुचना अधिकारी डिएसपी शंकर पोखरेलले जानकारी दिए ।
घाईतेमध्ये केसी बोल्न सक्ने र घिमिरे बोल्न सक्ने अवस्थामा नभएको पोखरेलको भनाई छ । राती पौने दश बजे भएको दुर्घटनाको जानकारी पाउनासाथ अस्थाई प्रहरी पोष्ट अर्घातोसका प्रहरी नायव निरीक्षक सुर्यप्रसाद पन्थीको कमाण्डमा घटनास्थलमा पुगेको टोलीले उद्धार गरेको थियो ।
