रोल्पा । नेपाली कांग्रेसका केन्द्रिय सदस्य तथा पूर्व परराष्ट्रमन्त्री नारायण प्रकाश (एनपी)साउदले नेपाली कांग्रेस रोल्पाले आयोजना गरेको भेटघाट तथा अन्तरक्रिया कार्यक्रमलाई सम्बोधन गर्दै नेपाली कांग्रेस विकास प्रेमी पार्टी भएको बताए ।
प्रमुख अतिथिको रूपमा बोल्दै साउदले नेपाली कांग्रेस पार्टी अहिले प्रमुख प्रतिपक्षी दल भएर पनि आम नागरिकले नेपाली कांग्रेसबाट विकासको आशा गरेको बताए ।
उनले नेपाली कांग्रेस केन्द्रिय कार्यसमितिको जिल्ला स्तरीय भेटघाट तथा अन्तरक्रिया कार्यक्रम रोल्पाको कार्यक्रम १० औं भएको बताए ।
रोल्पा भन्न बित्तिकै सर्सती जनयुद्धको याद आउने र पहिले पनि आफू रोल्पा आएको स्मरण गर्दै उनले भने अरु जिल्लामा नेपाली कांग्रेसका व्यक्तिहरुले ठाउँ छोडेको र रोल्पाका नेपाली कांग्रेसका नेता तथा कार्यकर्ताले ठाउँ नछोडेको बताए ।
नेकपा माओवादी केन्द्रले कुनै बेला हामीले कुटेर,मारेर नेपाली कांग्रेसको आस्था,विचारलाई मार्न सकिन्छ र नेपाली कांग्रेसलाई सिध्याउन सकिन्छ भन्ने सोच लिएर अगाडि आएको बताउदै साउदले भने - हाम्रो आस्था विचार मरेन्न र उनीहरूको विचार, सोचमा परिवर्तन भयो ।
कुनै समयमा एकल दुई तिहाई मत लिएको नेकपा माओवादी केन्द्र अहिले विस्तारै रूपमा कमजोर बन्दै गएको र पछिल्लो समय रुपान्तरणमा पुगेको समेत उनले बताए ।
नेपाली कांग्रेस रोल्पामा पुरानै अवस्थामा फर्कन्छ तपाईं ढुक्क हुनुहोस् र निरन्तर अगाडि बढ्नुहोस मेरो शुभकामना छ - साउदले भने ।
यसैबिच, नेपाली कांग्रेसका केन्द्रिय सदस्य अब्दुल सत्तारले अब आउने नेपाली कांग्रेस कस्तो हुनुपर्छ र के छ कांग्रेसको अवस्था बुझ्न आफू सात ओटै प्रदेशको जिल्लामा पुग्ने कार्यक्रम अनुसार आफूहरू रोल्पा आएको बताए ।
सत्तारले राजनीति भनेको व्यक्ति अनुभुती र विश्लेषण भएको र जनताको आम समस्यालाई समाधान गर्नु नेतृत्वको दायित्व भएको र पदको लागि राजनीति नभएको बताए ।
नेपाली कांग्रेस कुनै गुट उप-गुटको प्रचार-प्रसार गर्नको लागि नभई कसरी नेपाली कांग्रेसलाई एक ढृका,मजबुत , बलियो र एकल रूपमा आगामी चुनावमा जाने वातावरण बताउनको लागि जिल्ला स्तर र प्रदेश स्तरमा पुग्ने गरेको उनले बताए ।
साथै उनले नेपालमा भ्रष्टाचार र सहकारीमा रकम अपचल गर्ने काम बढेकाले नेपाली कांग्रेस त्यसलाई निरन्तर आवाज उठाउने गरेको र न्याय दिनको लागि सडक देखि सदन सम्म आवाज उठाएका कारण संसदीय छानबिन समिति बनेको जिकिर गरे ।
रोल्पामा नेपाली कांग्रेस एक भएर अगाडि बढी कम्युनिस्ट पार्टीहरुसँग चुनावमा बिजयी भएमा मात्र आजको अन्तरक्रिया सफल भएको मान्निने गरेको सत्तारले बताए ।
रोल्पा जिल्लामा पनि नेकपा माओवादी केन्द्रको जनयुद्धको दलदलमा पनि नेपाली कांग्रेसलाई जोगाउन सफल भएकोले आज पालिकाको अध्यक्ष ,उपाध्यक्ष ,वडा अध्यक्ष र वडा सदस्यमा निर्वाचित हुन सफल भएकोमा म आभार व्यक्त गर्छु - सत्तारले भने ।
त्यसैगरी, नेपाली कांग्रेसका केन्द्रिय सदस्य गोविन्द बहादुर शाहीले नेपाली कांग्रेसले माओवादी केन्द्रलाई शान्ति प्रक्रियामा गएको र आम निर्वाचनमा जाँदा नसोचेको परिमाण बेहोर्नु परेको बताए ।
हामी राणा, राजा र पञ्चायतमा कांग्रेस पछि परेन तर जनयुद्धमा रहेको माओवादी केन्द्रलाई शान्ति प्रक्रियामा लिएर चुनावमा जाँदा ठूलो पराजित भोग्नु परेको उनले बताए ।
अहिलेसम्म नेपाली कांग्रेसमा लागेर ज्यान गुमाएका व्यक्तिलाई कुनै घोषणा र कुनै ठाउँमा उनीहरूको नाम उल्लेख नगर्नु अहिलेको नेपाली कांग्रेसको लागि दु:खद पक्ष भएको उनले बताए ।
नेपाली कांग्रेस बारम्बार सरकारको नेतृत्व गर्दा पनि आफ्नो संस्थामा लागेर यो देशको परिवर्तन गर्न नेतृत्वदायी भुमिका खेल्ने र देशको लागि ज्यान गुमाएका , घाइते अपाङ्ग भएका व्यक्तिलाई केही नाम नदिनु लज्जास्पद विषय भएको छ - शाहले भने ।
यस्तै, नेपाली कांग्रेस लुम्बिनी प्रदेशका सभापति अमरसिंह पुन मगरले सिङ्गो देश,सिङ्गो कांग्रेस र सिङ्गो रोल्पा कांग्रेस कहाँ छ भन्ने कुरा अहिलेको चिन्ता भएको बताए ।
पुनले भने - मैले त स्थानीय तह निर्वाचनमा देशभर गठबन्धन नगरौं भनेकै हो तर आवश्यकताको आधारमा गठबन्धन गरौं भनेको थिए ,त्यो शिर्ष नेतृत्वले कमजोर गर्नु भएको हो - उनले भने ।
उनले माथि नेपाली कांग्रेसका सभापति शेर बहादुर देउवा र नेकपा माओवादी केन्द्रका उपाध्यक्ष कृष्ण बहादुर महरासँग भेटघाट गरेको र दुबैले तपाईं गठबन्धनको हिसाबले रोल्पा जानुहोस भनेको स्मरण गरे ।
भेटघाटपछी आफूले नेकपा माओवादी केन्द्रका उप-महासचिव बर्षमान पुनसँग भेटघाट गरेको र रोल्पामा हाम्रो इन्चार्ज दीपेन्द्र कुमार पुन हुनुहुन्छ र उहाँसँग सल्लाह गर्नुहोस् भनेको र रोल्पा आएर दिपेन्द्र पुनलाई फोन गर्दा कहिले दारबोट छु, कहिले कहाँ छु भनेर भेटघाट गर्ने वातावरण नमिलेको उनले बताए ।
पछि आफू अगाडि बढेको र चुनावमा पछि असफल हुन पुगेको र हारको कारण आफ्नो पार्टी भित्रका केही व्यक्तिले सहयोग नगर्दा रोल्पामा गठबन्धन हुँदा पनि आफूले हार बेहोर्न पुगेको पुनले बताए । नेपाली कांग्रेसका थुप्रै नेताहरुको कारण देश विकास निर्माण , लोकतन्त्र,गणतन्त्र स्थापना गर्न सफल भएको छ - पुनले भने ।
