सैनामैना । रुपन्देहीको सैनामैना नगरपालिकामा राष्ट्रिय युवा परिषद् अन्तरगत युवामैत्री स्थानीय शासनका लागि युवाका मुद्दामा बहस पैरवी कार्यक्रम गरिएको छ ।
सैनामैना नगरपालिका शिक्षा, युवा तथा खेलकुद शाखाको आयोजनामा शनिबार सैनामैना २ को बामरी पार्टी प्यालेसको सभाहलमा युवा मैत्री स्थानीय शासनका लागि युवाका मुद्दामा बहस पैरवी कार्यक्रम सम्पन्न भएको हो ।
नगरपालिकाका ११ वटै वडाका युवाको प्रतिनिधित्व हुने गरी करिव ८० जनाको उपस्थितीमा युवामैत्री स्थानीय शासनका लागि युवाका मुद्धामा बहस पैरवी भएको थियो ।
युवामैत्री स्थानीय शासनका लागि युवाका मुद्धामा बहस पैरवी गणेश खनालको सहजीकरण र जवाफदेहीका रुपमा सैनामैना नगरपालिकाकी उप–प्रमुख विना राना, शिक्षा तर्फबाट सहिद नारायण पोखरेल रामापुर क्याम्पसका पुर्व क्याम्पस प्रमुख दिनेश पन्थी, मिडियाको तर्फबाट रातोपाटी अनलाइनका लुम्बिनी प्रदेश व्युरो तेजेन्द्र केसी, राजनैतीक तर्फबाट अभियान्ता तथा राजनैतिक कर्मी सरिता श्रीस र राष्ट्रिय युवा परिषद्का प्रशिक्षक डा.आविष्कार पराजुली लगायत थिए ।
युवाका मुद्दामा बहस पैरवी कार्यक्रममा सैनामैना नगरपालिकाकी उप–प्रमुख विना रानाले आगामी दिनमा युवा लक्षित कार्यक्रमलाई विशेष प्राथमिकता दिने बताईन । युवालाई संगठित गरेर युवाका आवश्यकता, सुझावलाई मनन गर्दै युवा संशक्तिकरणको लागि नगरपालिकाले जुन कार्यक्रमको थालनी गरेको छ यसलाई पुर्णता दिन युवाहरु पनि सकारात्मक रुपमा सक्रियताका साथ लाग्नुपर्ने उनले बताईन ।
जस्तोसुकै काममा युवाको साथ सहयोग निरन्तर रहने खालको वातावरण भयो भने विकासमा सहज हुने भन्दै उप–प्रमुख रानाले युवामा एकता हुनुपर्नेमा जोड दिईन । सहिद नारायण पोखरेल रामापुर क्याम्पसका पुर्व क्याम्पस प्रमुख दिनेश पन्थीले युवामैत्री स्थानीय शासन सञ्चालनका लागि कस्ता मुद्धा प्राथमिकतामा पर्छन, युवाका अधिकार, स्वतन्त्रता, वर्तमान शिक्षाको अवस्था र विकासका बारेमा युवाहरुलाई प्रशिक्षण दिएका थिए ।
यस्तै रातोपाटी अनलाइनका लुम्बिनी प्रदेश व्युरो तेजेन्द्र केसीले युवामैत्री स्थानीय शासन सञ्चालनमा मिडियाको भुमिका, वर्तमान समयमा मिडियाको अवस्था, मिडियाले समाजमा खेलेको भुमिका, खोज पत्रकारिता भन्दा केहि पत्रकारहरुले नम्स भन्दा बाहिर रहेर गलत समाचार प्रयोग गरी व्यवसाय गरेको लगायतका विषयमा आफना भनाइ प्रस्तुत गरेका थिए ।
अभियान्ता तथा राजनैतिक कर्मी सरिता श्रीसले युवामा बढ्दै गएको राजनैतिक वितृष्ण, राजनैतिकमा सक्रिय बन्न के गर्न सकिन्छ, कुनै पनि क्षेत्रमा असफल भएपछि अन्तिम विकल्प राजनैतिकमा लाग्ने प्रवृतीका विषयमा युवाहरुलाई बताएकी थिईन भने राष्ट्रिय युवा परिषद्का प्रशिक्षक डा.आविष्कार पराजुलीले युवा परिचालन, युवाको अहिलेको अवस्था, युवाका अवसर र चुनौती, युवा वैदेशिक पलायनका विषयमा युवाहरुलाई प्रशिक्षण गरेका थिए ।
बहस कार्यक्रममा युवाहरुले स्थानीय तहले बेरोजगारको समस्या समाधान हुने खालका स्वरोजगारमूलक युवा लक्षित कार्यक्रम ल्याउनुपर्ने बताएका छन् ।
