काठमाडौं । आइसिसी टि-ट्वान्टी विश्वकप क्रिकेट प्रतियोगिताअन्तर्गत समूह चरणको आफ्नो अन्तिम खेलमा नेपाललाई पाखा लगाउँदै बंगलादेशले सूपर ८ मा स्थान पक्का गरेको छ ।
वेस्टइन्डिजको सेन्ट भिसेन्टस्थित अरनोस भाले रङ्गशालामा नेपाललाई २१ रनले स्तब्ध पार्दै बंगलादेशले सुप्र ८ को यात्रा तय गरेको हो । समूह डी बाट बंगलादेशले सुपर ८ मा ठाउँ बनाएसँगै जारी विश्वकप क्रिकेटमा सुपर ८ समीकरण पूरा भएको छ ।
सूपर ८ मा पुगेका ८ टिममध्ये समूह ए मा बंगलादेशसहित, भारत, अष्ट्रेलिया र अफ्गानिस्तान रहँदा समूह बी मा आयोजक अमेरिकासहति इङ्ल्याण्ड, वेष्टइण्डिज र साउथ अफ्रिका छन् । सुपर ८ का खेलहरु २० जुनबाट सुरु हुनेछ । सेमिफाइनल खेल २७ जुनमा हुनेछ। फाइनल खेल जुन २९ मा हुनेछ ।
समूह चरणमा भएको खेलमा समूह ए बाट ३ खेलमा जित र एक खेलमा वर्षाका कारण अकं बाँडेपछि ७ अंकसहित भारत शीर्ष स्थानमा रहेर सुपर ८ मा पुगेको हो ।
अमेरिका भने २ खेलम जित एक खेलमा हार र १ खेलमा अंक बाँड्दै ५ अंकसहित दोस्रो स्थानमा रहेर सुपर ८ मा पुगेको हो । यो समूहबाट पाकिस्तान, क्यानडा र आयरल्यान्ड बाहिरिएका छन् ।
समूह बी बाट अपराजित रहेको अस्ट्रेलिया ४ खेलमा ८ अंक जोड्दै शीर्ष र इङ्ल्याण्ड २ खेलमा जित, एक खेलमा हार र एक खेलमा अंक बाँड्दै ५ अंकमा दोस्रो स्थानमा रहेर सुपर ८ मा पुग्यो । समूह बी बाट स्कटल्यान्ड, नामिबिया र ओमान बाहिरिए ।
समूह चरणका एक खेल खेल्न बाँकी रहेका अफगानिस्तान र वेस्ट इन्डिज पनि सुपर ८ मा पुगिसकेका छन् । तीन खेल खेल्दा समूह सी मा अफगानिस्तान र वेस्ट इन्डिज दुवै टोली अपराजित छन् । यो समूहबाट न्यु जिल्यान्ड, युगान्डा र पपुवा न्यु गिनी बाहिरिए ।
नेपाल रहेको समूह डी बाट दक्षिण अफ्रिका र बंगलादेश सुपर ८ मा पुगेका छन् । दक्षिण अफ्रिका अपराजित रहँदै ८ अंकसहित शीर्ष स्थानमा रहेर सुपर ८ खेल्नेछ। तीन खेलमा जित र १ खेलमा पराजित बंगलादेश ६ अंकसहित दोस्रो स्थानमा रहेर सुपर ८ मा पुग्यो ।
समूह डी बाट नेपालसँगै नेदरल्यान्ड्स र श्रीलंका बाहिरिए । पहिलो पटक सन् २००७ मा भएको पहिलो विश्वकप भारतले जितेको थियो। २००९ को विश्वकप पाकिस्तानले २०१० र २०२२ को उपाधि इङ्ल्याण्डले उचालेको छ ।
सन् २०१२ र २०१६ को उपाधि वेस्ट इन्डिजले तथा २०१४ को उपाधि श्रीलंकाले र २०२१ को उपाधि अस्ट्रेलियाले जितेको थियो ।
