काठमाडौं । चिकित्सा विज्ञान राष्ट्रिय प्रतिष्ठान वीर अस्पतालको निर्देशकमा डा. दिलिप शर्मा नियुक्त भएका छन् । प्रधानमन्त्री केपी शर्मा ओलीको निजी चिकित्सक समेत रहेका शर्मा निर्देशकमा नियुक्त भएका हुन् ।
न्याम्स ऐन अनुसार उपकुलपति डा. भुपेन्द्र बस्नेतले आइतबार सहकुलपति समेत रहेका स्वास्थ्यमन्त्री प्रदीप पौडेललाई डा. दिलीप शर्मा, डा. समाज गौतम र डा.अनुपमा कार्कीको नाम सिफारिस गरेका थिए । गौतम र कार्कीलाई पछि पार्दै शर्मा निर्देशक बनेका छन् । उनी नेकपा एमालेनिकट हुन् । उनलाई निर्देशक बनाउन एमालेनिकट स्वास्थ्यकर्मीहरुले ठूलै लबिइङ गरेका थिए ।
वीरको निर्देशक डा. सन्तोष पौडेलको दुईवर्षे कार्यकाल गत ४ फागुनमा सकिएपछि डा. समाज गौतमले निमित्त निर्देशकको जिम्मेवारी सम्हालिरहेका छन् ।
शर्मा स्वास्थ्य क्षेत्रमा विवादरहित । मेडिकल काउन्सिलको रजिस्ट्रार र चिकित्सा शिक्षा अयोग जस्ता निकायमा समेत उनले जिम्मेवारी बहन गरेका थिए । उनै शर्माको काधमा वीर अस्पताल सुधार गर्ने जिम्मेवारी परेको छ ।
यता स्वास्थ्य बीमा बोर्डको कार्यकारी निर्देशक डा. रघुराज काफ्ले नियुक्त भएका छन् । सोमबार राति प्रधानमन्त्री निवास बालुवाटारमा बसेको मन्त्रिपरिषद्को बैठकले डा. काफ्लेलाई स्वास्थ्य बीमा बोर्डको कार्यकारी निर्देशक नियुक्त गर्ने निर्णय गरेको हो ।
स्वास्थ्य तथा जनसंख्यामन्त्री प्रदिप पौडेलको गृह जिल्ला तनहुँका डा. काफ्ले बीमा बोर्डको कार्यकारी निर्देशक बन्न सफल भएका हुन् । स्वास्थ्य तथा जनसंख्यामन्त्री पौडेलको प्रस्तावमा उनी स्वास्थ्य बीमा बोर्डको कार्यकारी निर्देशक बनेका हुन् ।
स्वास्थ्य बीमा बोर्डको कार्यकारी निर्देशकमा कमल पन्थी, डा. कृष्णप्रसाद अधिकारी र डा. काफ्लेको नाम सिफारिस भएको थियो । पन्थी र अधिकारीलाई पछाडि पार्दै डा. काफ्लेले बीमा बोर्डको कार्यकारी निर्देशकमा बाजी मारेका हुन् ।
