वासिङ्टन । अमेरिकाका पूर्वराष्ट्रपति डोनाल्ड ट्रम्पले इरानलाई कडा चेतावनी दिएका छन् । आइतबार ट्रुथ सोसल प्लेटफर्ममार्फत उनले यदि इरानले संयुक्त राज्य अमेरिकामाथि कुनै पनि प्रकारको आक्रमण गर्यो भने अमेरिकाले आफ्नो 'पूर्ण सैन्य शक्ति' प्रयोग गर्ने चेतावनी दिएका हुन् । इजरायलद्वारा इरानी आणविक र सैन्य संरचनामाथि गरिएको हालको आक्रमणसँग अमेरिकाको कुनै संलग्नता नरहेको भन्दै ट्रम्पले उक्त आक्रमणबारे आफूलाई पूर्वजानकारी भए पनि अमेरिका त्यसमा सहभागी नभएको स्पष्ट पारेका छन् ।
तेहरानका अनुसार इजरायली आक्रमणले दर्जनौँ मानिसको ज्यान लिएको छ, जसमा शीर्ष सैन्य कमाण्डर र आणविक वैज्ञानिकहरू पनि परेका छन्। इजरायली प्रधानमन्त्री बेन्जामिन नेतन्याहुले ‘आयातोल्लाह शासन’का सबै लक्ष्यहरूलाई लक्षित गर्ने घोषणा गरेका छन्। जवाफस्वरूप इरानले इजरायलमाथि घातक मिसाइल आक्रमण गरेको बताइएको छ ।
ट्रम्पले इजरान–इजरायलबीचको तनावमाथि चिन्ता व्यक्त गर्दै भने, "हामी यी दुई देशबीच सहज रूपमा सम्झौता गराउन सक्छौं र यो रक्तपातपूर्ण द्वन्द्वको अन्त्य गर्न सक्छौं।" उनले तेहरानलाई इजरायलसँग सम्झौतामा आउन आग्रह गर्दै ‘अझ क्रूर आक्रमण’को सम्भावनाबारे पनि चेतावनी दिएका छन् । उनको कार्यकालमा, सन् २०१८ मा ट्रम्पले ऐतिहासिक आणविक सम्झौताबाट अमेरिका एकपक्षीय रूपमा फिर्ता लिएका थिए, जसका कारण इरानमाथि पुनः कडा प्रतिबन्धहरू लागेका थिए। उक्त सम्झौता पूर्वराष्ट्रपति बराक ओबामाको पहलमा सम्पन्न भएको थियो । ट्रम्पको पछिल्लो टिप्पणीले क्षेत्रीय तनाव झनै बढ्ने संकेत देखिएको विश्लेषकहरू बताउँछन् ।
