नयाँ दिल्ली । भारतमा आयोजित १८औँ ब्रिक्स शिखर सम्मेलनमा सहभागी भएका चिनियाँ राष्ट्रपति सी चिनफिङ आइतबार स्वदेश फर्किएका छन्।
सम्मेलनको दोस्रो दिनको खुला सत्रमा सहभागी भएपछि राष्ट्रपति सी नेपाली समयअनुसार बिहान करिब १२ बजे नयाँ दिल्लीबाट चीनको राजधानी बेइजिङका लागि प्रस्थान गरेका हुन्। भारतीय सञ्चारमाध्यमका अनुसार सीको भारत भ्रमण औपचारिक रूपमा सम्पन्न भएको छ।
भारत भ्रमणका क्रममा सीले ब्रिक्स सम्मेलनमा सहभागिता जनाउनुका साथै भारतीय प्रधानमन्त्री नरेन्द्र मोदीसँग द्विपक्षीय भेटवार्तासमेत गरेका थिए। सम्मेलनका क्रममा मोदी, सी र रुसी राष्ट्रपति भ्लादिमिर पुटिन एउटै समूह तस्बिरमा देखिएका थिए।
सी र मोदीबीचको भेटलाई भारत–चीन सम्बन्धका दृष्टिले महत्वपूर्ण मानिएको छ। भेटवार्तामा दुई देशबीचको सम्बन्ध सुधार, सीमा क्षेत्रमा शान्ति तथा आर्थिक सहकार्यलगायतका विषयमा छलफल भएको बताइएको छ।
पछिल्लो समय भारत र चीनबीच सम्बन्ध सुधारका लागि विभिन्न तहमा संवाद अघि बढिरहेका बेला भएको सीको भारत भ्रमण र मोदीसँगको भेटलाई विशेष चासोका साथ हेरिएको छ। दुई देशबीच व्यापार तथा आर्थिक सहकार्यको सम्भावना रहे पनि सीमा विवादलगायतका विषय अझै चुनौतीका रूपमा कायम छन्।
ब्रिक्स सम्मेलनमा सीको सहभागिताले चीनको बहुपक्षीय कूटनीतिमा ब्रिक्सको महत्वलाई समेत उजागर गरेको छ। सम्मेलनमा विश्वव्यापी आर्थिक सहकार्य, व्यापार, सुरक्षा, बहुपक्षीय व्यवस्था तथा समसामयिक अन्तर्राष्ट्रिय विषयमा सदस्य राष्ट्रका नेताहरूबीच छलफल भएको थियो।
सीको भारत भ्रमण छोटो भए पनि मोदीसँगको प्रत्यक्ष भेट र ब्रिक्सको साझा मञ्चमा भारत, चीन र रूसका शीर्ष नेताहरूको उपस्थितिले विश्व राजनीतिक वृत्तमा विशेष अर्थ राखेको छ।
