मस्को । युक्रेनको सीमावर्ती रूसी क्षेत्र कुस्र्कको समुद्री तटमा मङ्गलबार युक्रेनी ड्रोन आक्रमण हुँदा तीन जनाको मृत्यु भएको छ भने सात जना घाइते भएका छन् । मृतकमध्ये एक जना रूसी नेसनल गार्डका वरिष्ठ जनरल रहेका छन् ।
क्षेत्रीय कार्यवाहक गभर्नर अलेक्जान्डर खिन्स्टेनका अनुसार आक्रमण छुट्टी मनाइरहेका सर्वसाधारण नागरिकहरूको क्षेत्रमै भएको थियो। उक्त स्थानमा कुनै सैन्य गतिविधि नभएको स्पष्ट पार्दै उनले घटनामा बालबालिकासहित परिवारहरू प्रभावित भएको बताए ।
खिन्स्टेनका अनुसार पहिलो विस्फोटपछि नागरिकहरूलाई सुरक्षित स्थानमा सार्ने क्रममा दोस्रो ड्रोन आक्रमण हुँदा जनरलको मृत्यु भएको हो। घाइतेमध्ये पाँच जनाको अवस्था गम्भीर रहेको र उनीहरूको उपचार क्षेत्रीय अस्पतालमा भइरहेको छ ।
घटनापछि आपतकालीन सेवाहरू तुरुन्तै परिचालन गरिएको र अनुसन्धान कार्य जारी रहेको जनाइएको छ। युक्रेनी पक्षबाट भने घटनाबारे अहिलेसम्म कुनै औपचारिक टिप्पणी आएको छैन ।
