काठमाडौं- गायिका एलिना चौहान र गायक प्रताप दासको सम्बन्धलाई लिएर भइरहेको अनेक परिचर्चाले बिहीबारदेखि करिब टुंगो पाएको छ।
तीन महिनादेखि अमेरिकामा सांगीतिक टुरमा रहेका यी दुईजनाले सामाजिक सञ्जालमा अनेक भिडियो, फोटो र पोस्ट हालिरहेपछि फ्यानहरूले सम्बन्धमा प्रश्न उठाउँदै आएका थिए ।
तर उनीहरूले आफूहरूबीच दाजुबहिनीको सम्बन्ध रहेको बताउँदा पनि सामाजिक सञ्जालमा भाइटीकाको प्रतिक्षा गरिरहेको कमेन्टको ओइरो लागिरहेको थियो ।
तर उनीहरूले अमेरिकामै रहँदा भाइटीका लगाएका छन् । त्यसपछि एलिनाले टिप्णी गरिन्, ‘दाजुबहिनी जस्तो पवित्र सम्बन्धमा पनि दाजुबहिनी हो भनेर प्रमाणित गर्नुपर्ने हाम्रो समाज !’
उनी प्रतापसँग भाइटीका लगाएसँगै नेपाल यात्रामा निस्किएकी छन् । ‘धेरै समयपछि आफ्नै देश फर्किन पाउनु एउटा असिम खुशी हो । नेपाल फर्किन पाउँदा मन अत्यन्त खुशी छ’, उनले लेखेकी छन् ।
यसअघि आफूहरू दाजुबहिनी भएको जवाफ दिन एलिना-प्रतापले अमेरिकाबाटै तिहार गीत पनि सार्वजनिक गरे । तर फ्यानहरूले गीतले नहुने भाइटीका नै आउनुपर्ने भन्दै प्रश्न गरिरहे ।
उनीहरूले अमेरिकाको सांगीतिक टूरमै रहेका बेला नाचगानका भिडियो र फोटो साझा गरिरहेका थिए । तर सामाजिक सञ्जालमा ‘सुन्दर जोडी’ भन्दै टिप्पणी पनि गरियो ।
तर आफूहरू दाजुबहिनी भएको बताउँदै आएका उनीहरूले तिहारको भाइटीकाको शुभमूहुर्तमा गीत ल्याउँदै आलोचकलाई जवाफ दिएका थिए । त्यो गीत सार्वजनिक पनि भइसकेको छ ।
यसअघि एलिनाले गलत नबुझ्ने, गलत नलेख्ने र एउटी नारीलाई खुसी भएको हेर्न सक्ने समाज हामीले कहिले बनाउने ? भनेर टिप्पणी पनि गरेकी थिइन् । विष्णु सापकोटासँग डिभोर्स भएपछि एलिना अहिले सांगीतिक करिअर बनाउनमै केन्द्रित छिन् ।
