कपिलवस्तु l इस्लामी पात्रो अनुसार दशौँ महिनाको पहिलो दिन ईद-उल-फित्र पर्व देशभरका मुसलमानहरूले उत्साहपूर्वक मनाएका छन्।
कपिलवस्तुको कृष्णनगर, चन्द्रौटा, पकडी, तौलिहवा लगायतका क्षेत्रमा समुदायले नयाँ लुगा लगाई ईदको नमाज पढेका थिए र ठूला बडाबाट आशीर्वाद लिएका थिए।
पर्वको विशेषताअनुसार मुसलमानहरूले आफन्त र साथीभाइसँग अंकमाल गरी आशीर्वाद आदानप्रदान गर्छन्। सेवइ, खजुर जस्ता मिठा परिकारहरूको आदानप्रदानका साथै गरिबलाई दान दिइने चलन यस पर्वको अर्को महत्वपूर्ण पक्ष हो।
पेश इमाम हजरत मौलाना अली हसन निजामीका अनुसार, ‘कुरान’ अनुसार एक वर्षभित्रको बचतको साढे दुई प्रतिशत नगद वा जिन्सी गरिबलाई बाँडिने जकात पर्वका क्रममा वितरण गरिन्छ।
मुस्लिम समुदायले एक महिना लामो रोजा सकाएपछि ईद मनाउँछन्। यस वर्ष मौसमका कारण नमाज जमा मस्जिदमा पढाइयो। सो अवसरमा नेपाली कांग्रेसका प्रदेश सभा सदस्य सुधाकर पाण्डे, कपिलवस्तु नगर प्रमुख सुदिप पौडेल र युवा नेता अनुप पाण्डेले मुस्लिम समुदायलाई अंकमाल गरी शुभकामना दिएका थिए।
समाजसेवी मुमताज खाँले भने, “ईद-उल-फित्र संयमता, धैर्यता, विश्व शान्ति र भाइचाराको सन्देश दिने पर्व हो। यसले राष्ट्रिय एकता, आपसी मित्रता, सामाजिक सद्भाव र धार्मिक सहिष्णुतालाई थप सुदृढ बनाओस्।”
मुस्लिम आयोगका कार्यवाहक अध्यक्ष महम्मदीन अलीले भने, चन्द्रमा नदेखिएको कारण नेपालमा शनिबार पर्व परेको र सार्वजनिक बिदामा कुनै अन्यौल नराख्न आग्रह गरे। ईद पर्वले सामाजिक मेलमिलाप, सहिष्णुता र राष्ट्रिय समृद्धिका लागि एक सशक्त सन्देश दिएको छ।
