पाल्पा । नेपाली कांग्रेस पाल्पा क्षेत्र नं. २ मा ‘जरा अभियान’ तथा क्रियाशील सदस्यता अद्यावधिक कार्यक्रम औपचारिक रूपमा सुरु गरिएको छ। पार्टीको आधारभूत संरचना सुदृढ गर्दै आगामी निर्वाचनलाई लक्षित गरी अभियान सञ्चालन गरिएको हो।
कार्यक्रममा नेपाली कांग्रेसकी केन्द्रीय प्रतिनिधि निर्मला क्षेत्रीले ‘जरा अभियान’को आवश्यकता र महत्वबारे प्रकाश पार्दै संगठनको दीर्घकालीन सफलता जरा सुदृढीकरणमै निर्भर रहने बताइन्। उनले भनिन्, “मजबुत जरा बिना संगठन दिगो बन्न सक्दैन। यस अभियानले पार्टीलाई नयाँ ऊर्जा र स्पष्ट दिशा दिनेछ।”
जिल्ला सभापति हिमालदत्त श्रेष्ठको प्रमुख आतिथ्यतामा भएको कार्यक्रममा केन्द्रीय प्रतिनिधि हरि न्यौपाने, लुम्बिनी प्रदेश सभा सदस्य वीर बहादुर राना, क्षेत्रीय सभापति मुक्तिराम जिसी तथा प्राविधिक सुमन भट्टराईलगायतले पार्टीको ऐतिहासिक पृष्ठभूमि, वर्तमान चुनौती र आगामी रणनीतिबारे धारणा राख्दै सम्पूर्ण कार्यकर्तालाई एकताबद्ध भएर अभियान सफल बनाउन आह्वान गरे।
अभियानअन्तर्गत पुराना सदस्यहरूको विवरण अद्यावधिक गर्नुका साथै नयाँ, ऊर्जाशील तथा युवामुखी सदस्यहरूलाई समेट्ने लक्ष्य राखिएको छ । क्षेत्रका १० वटै वडामा एक महिनाभित्र कार्यक्रम सम्पन्न गर्ने योजना तय गरिएको छ।
स्थानीय नेतृत्वका अनुसार, यस अभियानले संगठनात्मक क्षमता अभिवृद्धि गर्नुका साथै जनतासँगको सम्बन्धलाई अझ सुदृढ बनाउने अपेक्षा गरिएको छ। केन्द्रीय नेतृत्वले यस्ता कार्यक्रमलाई देशव्यापी रूपमा विस्तार गर्ने संकेत दिएको छ, जसले नेपाली कांग्रेसको संगठनलाई दीर्घकालीन रूपमा अझ बलियो बनाउने विश्वास व्यक्त गरिएको छ।
