काठमाण्डाै – पछिल्ला केही दिनयता पश्चिम तराई क्षेत्रमा अत्यधिक गर्मी बढ्दै जाँदा जनजीवन प्रभावित बनेको छ । विशेषगरी लुम्बिनी र सुदूरपश्चिम प्रदेशका तराई भू–भागमा तापक्रम बढेसँगै दैनिक गतिविधि, स्वास्थ्य सेवा, व्यापार व्यवसाय तथा कृषि क्षेत्रसमेत प्रभावित हुन थालेका छन् ।
बाँके, बर्दिया, दाङ, कैलाली, कञ्चनपुरलगायत जिल्लामा दिउँसोको समयमा सडक तथा बजार क्षेत्र सुनसान देखिन थालेका छन् । चर्को घाम र तातो हावाका कारण मानिसहरू अत्यावश्यक कामबाहेक घरबाहिर निस्कन सक्ने अवस्था छैन । स्थानीय बासिन्दाले बिहान र बेलुकाको समयमा मात्र किनमेल तथा अन्य कामकाज गर्ने गरेका छन् ।
मौसमविद्हरूका अनुसार पश्चिमी तराईमा वर्षा नहुँदा तापक्रम लगातार बढिरहेको छ । नेपालगञ्ज, धनगढी, टीकापुर, महेन्द्रनगर तथा घोराही आसपासका क्षेत्रमा दिनभरि तातो हावा चल्ने क्रम बढेको स्थानीयवासीले बताएका छन् ।
यस्तै मधेश प्रदेशका पर्सा, बारा, रौतहट, सर्लाही, महोत्तरी, धनुषा र सिरहा जिल्लामा पनि गर्मीको प्रभाव बढेको छ । जनकपुर, वीरगञ्ज र गौर क्षेत्रमा समेत दिउँसोको तापक्रम उच्च रहँदा सर्वसाधारणले कठिनाइ भोगिरहेका छन् ।
अत्यधिक गर्मीका कारण अस्पताल तथा स्वास्थ्य संस्थामा बिरामीको सङ्ख्या बढ्न थालेको छ । स्वास्थ्यकर्मीहरूका अनुसार गर्मीका कारण चक्कर लाग्ने, टाउको दुख्ने, शरीरमा पानीको कमी, थकान, उच्च रक्तचाप, झाडापखाला तथा ‘हिट स्ट्रोक’ जस्ता समस्या लिएर बिरामीहरू उपचारका लागि पुगिरहेका छन् । विशेषगरी बालबालिका, ज्येष्ठ नागरिक, गर्भवती तथा दीर्घरोगीहरू धेरै जोखिममा रहेका स्वास्थ्यकर्मीहरू बताउँछन् । प्रशस्त पानी पिउन, हल्का तथा सुतीकाे कपडा लगाउन, दिउँसोको समयमा अनावश्यक रूपमा बाहिर ननिस्कन र पोषणयुक्त तरल पदार्थ खान डाक्टरको सुझाव छ ।
वर्षा नहुँदा धान रोपाइँको तयारीमा समेत असर पर्ने चिन्ता किसानहरूले व्यक्त गरेका छन् । मौसमविद्हरूका अनुसार मनसुनी प्रणाली पूर्णरूपमा सक्रिय भएसँगै तापक्रम केही घट्ने अपेक्षा छ । यद्यपि तत्काल वर्षाको सम्भावना कम देखिएकाले केही दिनसम्म पश्चिम तराई तथा मधेशका जिल्लाहरूमा गर्मीको प्रभाव कायम रहन सक्ने अनुमान छ ।
