काठमाडौं । अर्जेन्टिनी फुटबल स्टार लियोनल मेस्सीका पिता जर्ज मेस्सीको ६८ वर्षको उमेरमा निधन भएको छ। अर्जेन्टिनी सञ्चारमाध्यमका अनुसार रोजारियोस्थित एक क्लिनिकमा उपचाररत उनको शनिबार राति निधन भएको हो। जर्जको निधनप्रति अर्जेन्टिना फुटबल एसोसिएसन (एएफए) र बार्सिलोनाले शोक व्यक्त गर्दै मेस्सी परिवारप्रति समवेदना प्रकट गरेका छन्।
जर्ज मेस्सी लियोनलका पिता मात्र नभई उनको फुटबल यात्राका प्रमुख मार्गदर्शक तथा सल्लाहकार थिए। उनले बाल्यकालमै मेस्सीको प्रतिभालाई अघि बढाउन महत्वपूर्ण भूमिका खेलेका थिए। मेस्सी १३ वर्षको हुँदा उनलाई अर्जेन्टिनाबाट स्पेन लैजाने र बार्सिलोनाको युवा एकेडेमीमा आबद्ध गराउने प्रक्रियामा जर्जको महत्वपूर्ण योगदान थियो। त्यतिबेला मेस्सी ग्रोथ हर्मोनको कमीसम्बन्धी समस्याबाट पीडित थिए र बार्सिलोनाले उनको उपचार खर्च व्यहोरेको थियो। जर्जले पछि छोराको एजेन्ट तथा रणनीतिक सल्लाहकारका रूपमा समेत काम गरेका थिए।
स्टिल कारखानामा सुपरभाइजरका रूपमा काम गरेका जर्जकी पत्नी सेलिया कुच्चितिनी हुन्। उनीहरूका चार सन्तानमध्ये लियोनल मेस्सी, रोड्रिगो, माटियास र मारिया सोल रहेका छन्। विश्व फुटबलका महान् खेलाडीमध्ये एक मेस्सीको करियर निर्माणमा जर्जको योगदानलाई उनको जीवनको महत्वपूर्ण आधारका रूपमा स्मरण गरिएको छ।
