काठमाडौं । जापानमा जारी २०औँ एसियन गेम्समा नेपालले पहिलो पदक जितेको छ। बुधबार टोयाहाशी जिम्नेसियममा भएको कराते प्रतियोगितामा नेपाली खेलाडी तेन्जिङ शेर्पाले कास्य पदक जित्दै एसियन गेम्समा नेपालको पदक खाता खोलेका हुन्।
तेन्जिङले पुरुष कुमिते ८४ केजीभन्दा माथिको तौल समूहमा प्रतिस्पर्धा गर्दै नेपालका लागि कास्य पदक सुनिश्चित गरेका हुन्। कास्य पदकका लागि भएको निर्णायक खेलमा उनले लाओसका खेलाडी वाथाना जायासनलाई ९–१ को फराकिलो अंक अन्तरले पराजित गरे।
तेन्जिङले पदकका लागि उत्कृष्ट प्रदर्शन गर्दै प्रतियोगितामा नेपालको पहिलो सफलता दिलाएका हुन्।
यसअघि सेमिफाइनलमा भने तेन्जिङ इरानका महमुद नेमातीसँग ५–० ले पराजित भएका थिए। सेमिफाइनलको हारपछि कास्य पदकका लागि प्रतिस्पर्धा गर्ने अवसर पाएका उनले निर्णायक खेलमा प्रभावशाली प्रदर्शन गर्दै पदक आफ्नो नाममा पारे।
तेन्जिङको यो सफलता जापानमा जारी एसियन गेम्समा नेपालको पहिलो पदक बनेको छ। उनको कास्य पदकसँगै नेपाली खेलकुद टोलीमा थप उत्साह बढेको छ भने अन्य खेलबाट पनि पदकको अपेक्षा गरिएको छ।
