काठमाडौं । नेपाली कांग्रेसको १५औँ महाधिवेशनअन्तर्गत असोज १६ गते काठमाडौंको खुलामञ्चमा हुने उद्घाटन समारोहमा आतिथ्यका लागि प्रमुख राजनीतिक दलका शीर्ष नेताहरूलाई औपचारिक निमन्त्रणा गरिएको छ।
कांग्रेस केन्द्रीय सहमहामन्त्री उदयशमशेर राणाको नेतृत्वमा गएको टोलीले राष्ट्रिय स्वतन्त्र पार्टीका सभापति रवि लामिछाने, नेकपा (एमाले)का अध्यक्ष केपी शर्मा ओली तथा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ सँग भेट गरी महाधिवेशन उद्घाटन समारोहमा उपस्थितिका लागि औपचारिक निमन्त्रणा प्रदान गरेको हो।
कांग्रेसले असोज १६ गते खुलामञ्चमा आयोजना हुने उद्घाटन समारोहमा विभिन्न राजनीतिक दलका प्रतिनिधि, कांग्रेसका नेता-कार्यकर्ता, शुभेच्छुक तथा आम नागरिकलाई सहभागी हुन आह्वान गरेको नेपाली काङ्ग्रेसका काबा मुख्यसचिब कृष्ण प्रसाद दुलालले बताउनुभयो ।
महाधिवेशन उद्घाटन समारोहमा विभिन्न राजनीतिक दलका शीर्ष नेतृत्वको उपस्थितिले राजनीतिक संवाद, सहकार्य, लोकतान्त्रिक अभ्यास र आपसी सद्भावलाई थप सुदृढ बनाउने कांग्रेसको विश्वास छ।
कांग्रेसले १५औँ महाधिवेशनलाई पार्टीको आन्तरिक लोकतन्त्र, संगठनात्मक पुनर्संरचना र भावी राजनीतिक दिशाबारे विमर्श गर्ने महत्वपूर्ण अवसरका रूपमा लिएको जनाएको छ।
