काठमाडौँ । नेपाली कांग्रेस अर्घाखाँची - काठमाडौं सम्पर्क समितिको प्रथम अधिवेशन सम्पन्न भएको छ ।
महामन्त्री गगन कुमार थापाको प्रमुख आतिथ्यतामा शनिबार नयाँबानेश्वर स्थित काठमाडौं ब्याङ्क्वीटमा अधिवेशन भव्यताका साथ सम्पन्न भएको हो ।
कार्यक्रममा बोल्दै महामन्त्री गगन कुमार थापाले अहिलेको सरकारलाई सहज ढंगले चल्न दिनुपर्ने बताएका छन । महामन्त्री थापाले अहिलेको सरकारलाई तिन वर्ष सम्म चल्न दिनुपर्ने र यसको जिम्मेवारी कांग्रेस र एमालेले लिनुपर्ने धारणा राखे । सरकारले गरेका कामको जिम्मेवारी कसैले नलिदाँ जनता अन्योलमा परेको उनको भनाई छ ।
सांसद समेत रहेका थापाले सरकारमा रहँदा राम्रो र बाहिर निस्कँदा आफैँ नराम्रो भन्ने प्रवृत्तिको अन्त्य हुनुपर्ने जिकिर गरे । पटक पटक गठबन्धनको सरकार बन्ने तर कसैले जिम्मेवारी नलिने कुरालाई तोडनुपर्ने उनले बताए । अबको तिन वर्षमा राम्रो काम गर्ने र त्यसलाई लिएर ८४ सालको चुनावमा जनतामाझ जाने अवस्था सिर्जना गर्नुपर्नेमा जोड दिए ।
कार्यक्रममा पूर्वमन्त्री तथा नेपाली कांग्रेसका नेता ढुण्डीराज शास्त्री, केन्द्रिय सदस्यहरु मान बहादुर विश्वकर्मा, पुष्पा भुसाल, नानु बास्तोला, नेता रेवती प्रसाद भुसाल, नेपाली कांग्रेस अर्घाखाँची जिल्ला सभापति केशव श्रेष्ठ, पूर्व प्रदेश सभा सदस्य निर्मला क्षेत्री लगायतले मन्तब्य राखेका थिए ।
अर्घाखाँची काठमाडौं सम्पर्क समितिको प्रथम अधिवेशनबाट सर्वसहमति रुपमा डा.मुक्तिराम श्रेष्ठको सभापतित्वमा कार्यसमिति समेत चयन गरिएको थियो ।
