काठमाडौं । नेपालको मारवाडी समुदायबाट पहिलो पटक प्रीति अग्रवाल रटेरियाले विश्वको सर्वोच्च शिखर सगरमाथाको सफल आरोहण गरी नयाँ इतिहास रचेकी छिन्। उनले सन् २०२६ मे २१ का दिन बिहान सगरमाथाको चुचुरोमा सफलतापूर्वक पाइला टेक्न सफल भएकी हुन्। ‘द समिट फोर्स प्रा. लि.’ का संस्थापक ङा तेन्जी शेर्पाका अनुसार प्रीतिले आफ्ना हिमाल आरोहण सहयोगी (क्लाइम्बिङ गाइड) हरू पासाङ शेर्पा र निमा थिन्दुक शेर्पाको बलियो साथमा यो ऐतिहासिक सफलता हासिल गरेकी हुन्। यस कीर्तिमानी आरोहणसँगै प्रीति सगरमाथाको शिखरमा पुग्ने विश्वकै पहिलो ‘प्राणिक हिटर’ र ‘अर्हातिक योगी’ समेत बनेकी छन्।
सगरमाथाको यो सफल आरोहण प्रीतिको पर्वतारोहण यात्राको एउटा ठूलो र महत्त्वपूर्ण कोशेढुङ्गा साबित भएको छ। यसअघि नै उनले सन् २०२५ सेप्टेम्बर २३ मा ‘द समिट फोर्स’ का गाइड पासाङ शेर्पासँगै विश्वको आठौँ अग्लो हिमाल मनास्लुको सफल आरोहण गरेर इतिहास बनाइसकेकी थिइन्। प्रीतिले आफ्नो पर्वतारोहण यात्रा सन् २०२४ मे महिनामा लोबुचे हिमालको आरोहणबाट सुरु गरेकी हुन्। त्यसयता छोटो समयमै उनले सन् २०२४ अक्टोबरमा अफ्रिकाको सर्वोच्च शिखर किलिमन्जारो र सन् २०२५ अप्रिलमा मेरा पिकको समेत सफल आरोहण गरिसकेकी छन्। यसरी छोटो अवधिमै एकपछि अर्को ठूला उपलब्धि हासिल गर्दै उनले सगरमाथाको शिखरमा मारवाडी समुदाय र समग्र नेपालकै नाम विश्वसामु चम्काउन सफल भएकी छन्।
