कपिलवस्तु । मुस्लिम धर्मावलम्बीहरूको महान पर्व ईद-उल-अजहा (बकर ईद) कपिलवस्तुमा हर्षोल्लासका साथ मनाइँदैछ । पर्वका अवसरमा लुम्बिनी प्रदेश सभा सदस्य सुधाकर पाण्डेय तथा कपिलवस्तु नगरपालिकाका मेयर एवं युवा नेता सुदिप पौडेलले मुस्लिम समुदायप्रति शुभकामना व्यक्त गर्दै सुख, शान्ति, समृद्धि र सामाजिक सद्भावको कामना गरेका छन् ।
ईदगाहमा पुगेर दुवै जनप्रतिनिधिले मुस्लिम समुदायसँग अंकमाल गर्दै शुभकामना आदानप्रदान गरेका थिए । सो अवसरमा प्रदेश सांसद पाण्डेयले नेपाल बहुसांस्कृतिक र बहुधार्मिक विशेषता बोकेको देश भएकाले बकर ईदजस्ता पर्वहरूले राष्ट्रिय एकता, सामाजिक सद्भाव तथा आपसी भाइचाराको भावना अझ सुदृढ बनाउने बताउनुभयो । उहाँले विविधताबीचको सहअस्तित्व र देशप्रेमको भावना सदैव कायम रहिरहोस् भन्ने शुभकामना व्यक्त गर्नुभयो ।
त्यस्तै, मेयर सुदिप पौडेलले सम्पूर्ण मुस्लिम समुदायप्रति हार्दिक शुभकामना व्यक्त गर्दै समाजमा आपसी सम्मान, सहिष्णुता र सद्भाव कायम रहिरहोस् भन्ने कामना गर्नुभयो ।
धार्मिक मान्यताअनुसार बकर ईद हजरत इब्राहिम (अ.स.) को त्याग, समर्पण र कुरबानीको स्मरणमा मनाइने पर्व हो । इस्लामिक विश्वासअनुसार अल्लाहको आदेशपछि हजरत इब्राहिम (अ.स.) ले आफ्ना छोरा इस्माईल (अ.स.) लाई कुरबानी दिन तयार हुँदा अल्लाह प्रसन्न भई उनको स्थानमा भेडाको कुरबानी स्वीकार गरिएको मान्यता रहेको छ ।
यस अवसरमा मुस्लिम समुदायले खसी, भेडा, राँगा लगायतका जनावरको कुरबानी गर्ने परम्परा निर्वाह गर्दै आएका छन् । कुरबानीको मासु तीन भागमा विभाजन गरी एक भाग गरिब तथा असहायलाई, दोस्रो भाग आफन्त तथा साथीभाइलाई र तेस्रो भाग आफ्नै परिवारका लागि प्रयोग गरिन्छ ।
इस्लामिक धर्मअनुसार कुरबानीलाई सुन्नत तथा वाजिब इबादतका रूपमा लिइन्छ । धार्मिक जानकार अहेले सुन्नत मदरसाका पेश इमाम हजरत मौलाना अलि हसन निजामीले सञ्चारकर्मी इमरान खानसँगको कुराकानीमा कुरबानीसम्बन्धी धार्मिक महत्वबारे जानकारी दिनुभएको हो ।
नेपालमा खसी, भेडा, भैंसी, राँगा तथा ऊँटको कुरबानी गर्ने चलन रहेको छ । गाई राष्ट्रिय जनावर तथा हिन्दू धर्मावलम्बीहरूको पूजनीय जनावर भएकाले नेपालमा गाईको कुरबानी नगर्ने परम्परा रहेको छ । भैंसी वा ऊँटको कुरबानी गर्दा सात जनासम्म मिलेर सहभागी हुने धार्मिक मान्यता रहेको बताइन्छ ।
ईद-उल-अजहा इस्लामी पात्रोअनुसार १०, ११ र १२ तारिखसम्म मनाइने गरिन्छ । यस वर्ष २०८३ जेठ १४ गते बिहीबार सरकारले सार्वजनिक बिदा दिएकोमा मुस्लिम समुदायले नेपाल सरकारप्रति आभार व्यक्त गरेका छन् ।
